De tredietsie van GRN
‘d’Eerste keer is n incident, de twijde keer touvaal en de daarde keer is der sproake van n tredietsie.’ t Eerste bericht woarin t GRN Festival van dit joar aankondegd wuir, opende mit dizze zin. Was bie de twijde moal t touvaal wel zo groot? Al bie d’eerste moal gaf d’organizoatsie aan dat ze t drij joar doun gingen en den kieken of ze dermit deurgoan wollen. Den zol de meugelkhaid dus openstoan om nait deur te goan. Vanòf n vaarde GRN Festival kin t pas n tradietsie nuimd worden. Gaait t doarop aan?
Schaande genog kon k nait bie de daarde òflevern wezen, dij lesten zotterdag op t pergram ston. Veur n laifhebber van de Grunneger toal en kultuur, dij zulf ook mit Grunnegs aan d’loop is, is t n evenmìnt om tredietsegetraauw bie te wezen. Der was weer n vol pergram in t veuruutzicht steld, woar k zekerwoar wat van mitmoaken wol.
De meziek dij op t pergram ston, was al interessant en òfwizzelnd, mit d’Oost-Grunneger band StAD, dij twinteg joar leden n körtdurende bekendhaid genoot mit heur alternatieve Grunneger pop en nou weer optreedt; t indierockduo Hister, de verrazzende winnoars van t Grunneger Laidjesfestival 2023; Remko Rotgers, nog mor kört aan d’loop as zanger-laidschriever en winnoar van de pebliekspries op datzulfde festival en Gert Sennema & Westkantstad, mit heur poëtische Westerkwartierder teksten woar smangs n steveg gitaargeluud onder ligt.
t Duo Driefzand was der nait om op te treden, mor om live nog n aantal òfleverns veur de podcastserie De Laidjestoavel op te nemen. AnneJan van Aperloo en Jan Peter Smit haren dit joar al 22 gesprekken mit kollegoa’s had over meziek in de streektoal. Nou schoven Hister en Robert de Keijser van StAD nog bie heur aan om proaten en speulden ze de finoale van heur meziekspel mit Jan Henk de Groot, Henk Scholte, Jan Sleumer en Alex Vissering. Aander proaterij was der in de talkshow Waistoe dat?, woarin eerst toalwaitenschopper Raoul Buurke en schriefster Ingeborg Nienhuis ingingen op d’overdracht van streektoalen. In t twijde gesprek mit historicus Maarten Zwiers en bassiste/zangeres Merel Weijer van Hister ging t over regionoale identiteit in streektoalmeziek.
In september verscheen t bouk In de Slochter Vrijstaat van Jutta Koolhof, n pseudoniem van schriever Auke Hulst. In dit fiktieve raaisbouk beschrift Jutta t bezuik dat ze in 1984 brocht het aan de jubilerende vrijstoat, dij zoch in 1964 noa t vinden van de gasbèlle òfschaaiden het van Nederland en sunt dij tied economisch floreert. In n specioale veurstellen nam Hulst t pebliek mit in d’alternatieve waarkelkhaid dij in zien gedachtenexperiment ontstoan is.
t Pergram veur de jeugd was dizze keer ekstroa vol. Der wuir veurlezen uut bekende kinderbouken, in t Grunnegs, vanzulf. t Jongste talent in de Grunneger meziekboudel, Suze Schoenmaker-Wilkens trad op in de biebeltaik. Der waren kreatieve dingen te doun, zo as aigen n tazze ontwaarpen mit n Grunneger uutsproak, de skyline van Grunnen (Stad?) uutsnieden mit n lasersnieder en n ansichtkoarde moaken loaten veur n green screen. En ze konden in t GRN-spel n aigen pervìnzie baauwen.
Veur de jeugd tussen 12 en 18 joar haar t Centrum Groninger Taal & Cultuur in oktober de vlogwedstried Vlog Em Mor! uutschreven. De winnoars doarvan kregen heur priezen uut handen van TikTok Tammo, dij zulf ook in priezen vuil: hai kreeg de Haide Bliksem Pries veur zien biedroage aan de promotie van t Grunnegs.
t GRN Festival kin pas vanòf n vaarde moal n tradietsie nuimd worden. Doar zel t wel op aangoan, as ik t bericht mit foto’s zai op de facebook-bladziede van theoater Kielzog. t Liekt weer n gezellege drokte te wezen, wat toch wel n taiken is van sukses. Der staait bie dat t n middag was om nait te vergeten veur aal laifhebbers van Grunnen en t Grunnegs. En veuraal schrieven ze ook ‘tot volgend joar!’. Den hoop ik der tredietsiegetraauw ook weer bie te wezen.
