Belofte nait inlöst
Vleden joar rond dizze tied haar Edwin Jongedijk zien mini-cd Terugge uut, dij hai prezenteerde mit n optreden in theoater Kielzog op t Hoogezaand. n Volweerdege cd was t nait worden, aalhouwel der aiglieks genog matrioal veur lag. Mor de sfeerverschillen tussen de nummers waren te groot om der n mooi gehail van te moaken. Terugge kreeg dus mor vief nummers en d’opvolger doarvan wuir al in t veuruutzicht steld.
De prezentoatsie doarvan was dik n joar leden al pland bie VanBeresteyn in Veendam, op lesten vrijdag 10 november. Mor t proces van laidjes moaken stoekde, der binnen te waaineg nummers opnomen en der is dus gain nije mini-cd. We mozzen t veuraal doun mit hits en aander nummers van de bestoande albums. Woar niks mit is, want ook mit t bekende waark, n goie live-band en de zanger zien typerende donkerbroene stemgeluud is n oavendje Jongedijk altied goud.
Gain nije mini-cd, dus, mor al wél n nije single: Allain De Schilder, dij doags noa t optreden debuteerde bie Radio Noord en doar votdoadelk bestempeld is as Gronings Goud veur dizze weke. t Nummer is n bewaarken van Only The Artist van Foy Vance. t Is n laifdeslaid en t gaait over wat joe in joen partner aantrekt. Muzikoal verschilt t dudelk van d’originele versie, veur t gevuil het Jongedijk ook dit weer tot n aigen nummer waiten te moaken.
Allain De Schilder is ain van drij nije nummers dij tot zowied opnomen binnen en meugelk n weg noar de nog te verschienen mini-cd vinden goan. Vanzulf kreeg t pebliek t nije waark al live te heuren. Over de nog te verwachten meziek wos Jongedijk al wel te vertellen dat dij mainst n haarfsteg karakter het: de nummers zellen wat donker en melancholisch wezen.
n Nait ingelöste belofte moakt schuld, wat joen blogger aangaait. t Is dus uutkieken noar n mement dat d’opvolger veur Terugge zien prezentoatsie beleven mag. Dat is den weer n goie aanlaaiden om noar n volgend optreden van Edwin Jongedijk te goan.
