Erwin de Vries krigt de K. ter Laanpries

Erwin de Vries- foto: Erwin de Vries

Zanger-laidschriever Erwin de Vries is uutroupen tot winnoar van de K. ter Laanpries 2021. Doarmit mag e endelk aansloeten in n lange riege winnoars van de mainst prestigieuze pries in de Grunneger toal- en kultuurwereld. Wel wat loat veur aine dij al datteg joar aan d’loop is in de Grunneger meziek.

Erwin zegt zoch hail aarg vereerd te vuilen en dat t n soort bekronen is van zien waark. ‘t Is veur mie n erkennen van wat k dou en dat dat in de smoak vaalt. En dat der voldounde lu binnen dij t woarderen wat k moak, dat vin k mooi.’ Magst zeggen dat ‘voldounde’ nog zwak uutdrukt is: in de Grunneger 1000 van lesten dezember ston e mit nait minder as 31 nummers noteerd. Dat moakt hom, noa Ede Staal, tot de grootste hofleverancier van de endejoarslieste van RTV Noord. De peblieke woarderen is groot, veur n artiest dij bloots in de Grunneger toal zingt.

Mor goud, d’erkennen van Stichting t Grunneger Bouk is der nou ook veur de, wat mie aangaait, eerste echte Grunneger popartiest. t Zel in 1997 west wezen dat k veur t eerst heurde van de band Deheleboel, mit Erwin as veurman. Tot den tou von ik de Grunneger meziek te volks en te folkloristisch, mit Pé en Rinus heur humoristische klaainkunst as positieve uutzundern. Deheleboel luit heuren dat t Grunnegs ook n geschikte toal is om popmeziek in te moaken. Dat deden ze o.a. mit ska- en rockmeziek. De band muik twij cd’s en was in 2001 zulfs even op de landelke radio te heuren as Tourartiest bie Radio Tour de France, n Landelke deurbroak leek derin zitten, mor Deheleboel stopde veurtied.

Erwin ging wieder as solo-artiest en bleek ook op dij menaaier n veulziedege zanger en tekstschriever, dij verschaaiden meziekstielen beheerst en teunt hou mooi, mor ook hou raauw de Grunneger meziek wezen kin. Dat kin e serieus doun of mit humor, hai kin t klaain holden, mor ook theoatroal wezen. Hai liekt net zo makkelk solo, mit allenneg n gitoar op te treden, as mit zien band De Zunderlingen of mit n groot orkest. In de zummer van 2019 bleek dat e as vocalist nog meer kwaliteiten het, mit n glansrol in de voetbaloperoa Veendammer Wind. As tekstschriever veur aander artiesten het hai pas in 2020 zien debuut moakt, mit t nummer Doe Bist Mien Zunneschien van Wia Buze.

Mien laifhebberij veur de Grunneger meziek is begund bie Deheleboel en Erwin de Vries en het n grode biedroage leverd aan mien gevuil van Grunneger wezen. k Stel mie veur dat nog meer Grunnegers der zo over denken. Om uut Erwin zien nummer De Dissident te citeren: ‘Dank veur aal dat mooie / daank veur aal dat goie’. Doarom mien felesitoatsies aan de Grunneger artiest dij zien pries al eerder verdaind haar.

De K. ter Laanpries bestaait uut n geldbedrag van doezend euro en n beeldje van kunstenoares Natasja Bennink uut Aizen. Erwin krigt dij op vrijdag 25 meert uutlangd in restaurant De Boerderij in Slochter.

Wèllen: Cd Lös, Wia Buze, Muziekencyclopedie, RTV Noord

Geef een antwoord

Het e-mailadres wordt niet gepubliceerd.