F1-legende Frank Williams uut tied kommen
Lesten zundag 28 november is de legendoarische veurmoaleg Formule 1-teamboas Frank Williams op 79-joarege leeftied uut tied kommen. Dat het t team noamens zien femilie bekendmoakt. Noadat Sir Frank lesten vrijdag in t zaikenhuus opnomen is, is hai doar omringd deur de femilie overleden.
Sir Francis Owen Garbatt Williams, CBE wuir op 16 april 1942 geboren in South Shields in t groafschop Tyne and Wear in t noorden van Engeland. Noa de schaaiden van zien ollu gruide hai wieder op bie n taande in Jarrow. Hai het ook n tied op n kostschoule zeten in Dumfries, Schotland. In 1974 traauwde hai mit Virginia Berry. Zai kregen drij kinder, woaronder dochter Claire, dij loater de ploatsvervangend teammanager veur heur voader wuir. In 2013 kwam Virginia uut tied as gevolg van kanker.
Frank Williams haar n körde loopboan as coureur, mor was doarin nait suksesvol. In 1966 richtde hai Frank Williams Racing Cars Ltd op, woarmit hai as teamboas dailnemen ging aan de Formule 2 en de Formule 3. In 1969 wuir de stap noar de Formule 1 moakt, mit zien vrund Piers Courage as coureur en n van Brabham gekochte racewoagen. Al vrij gaauw wuiren wat suksezzen behoald, mit twijde ploatsen in de Grands Prix van Monaco en de VS. t Joar doarop kreeg Williams n tragedie te verwaarken deur t dodelk verongelukken van Courage in de GP van Nederland. De joaren doarnoa bleven goie rezeltoaten uut, boeten n twijde ploatse veur Jacques Laffite in de Duutse GP van 1975. Ook in zoakelk opzicht haar Williams t lasteg, mit n konstante zuiktocht noar nije sponsoren. In 1976 nam Walter Wolf n groot dail van d’aandailen in t team over, woarvan Frank Williams nou bloots nog waarknemer was. Aan t ìnde van t joar verluit hai t team, dat nog n aantal joaren veurtbestoan bleef as Walter Wolf Racing.
Williams richtde soam mit kollegoa Patrick Head n nij team op, Williams Grand Prix Engineering, wat ain van de mainst suksesvolle teams in de Formule 1 worden zol. In de twijde helfte van t seizoen 1979 haren ze de beste woagen en wonnen ze vieve van de leste zeuven races. In 1980 won Alan Jones al de wereldtitel bie de rieders, In 1981 kwam Carlos Reutemann ain punt tekört veur t kampioenschap, mor in 1982 wuir mit Keke Rosberg weer de wereldtitel behoald.
In 1986 trof Frank Williams n perzoonlek noodlöt noa n testsessie op t circuit Paul Ricard, veuròfgoand aan t seizoen. In zien hoast om bie t vlaigveld van Nice te kommen, ruik hai mit zien huurauto van de weg, woarbie e zwoargewond ruik. Eerst wuir nog vreesd veur zien leven, wegens de hoge dwarslaesie dij hai doarbie opluip. Mor hai overleefde t en was vaar moand loater alweer aanwezeg bie de Britse GP. In ploats van zoch uut de racerij trugge te trekken, nam e zien waark as teamboas weer op, om t team noar nog grotere prestoatsies te laaiden.
Uutendelk won t Williams-team t/m 1997 in totoal zeuven wereldtitels bie de coureurs en negen bie de constructeurs. Mor in 1994 trof heur weer n dramatische gebeurtenis, mit t dodelk ongeval van Ayrton Senna in de GP van San Marino. Doarveur mos o.m. Frank Williams zulf zoch veur n Italioanse rechter verantwoorden, dij hom noa enkelde joaren uutendelk vrijsproken het van alle schuld. Noa Senna zien dood is Williams t Senna-logo op de Formule 1-woagens voeren goan en dut dat nog altied.
Jacques Villeneuve was in 1997 de veurlopeg leste coureur dij mit Williams n wereldtitel won. Noa dat seizoen stopde Renault as motorleverancier. Zunder dij febriekssteun wos t team drij joar nait meer te winnen. Van 2001 t/m 2004 wuiren mit BMW wel races wonnen en leek de weg noar boven weer inzet, mor deur d’overmacht van Ferrari bleef t doarbie. Williams vuil trugge in de middenmoot, mor wos mit Pastor Maldonado nog verrazzend de GP van Spanje van 2012 te winnen. In 2014 en 2015 was der nog n opleven noar de subtop, mor zunder zeges en twijmoal n daarde ploatse in de titelstried. t Team zakde doarnoa weg noar d’achterhoede, woar t zoch nog altied bevindt.
In 1987 kreeg Frank Williams de titel Order of the British Empire en wuir in 1999 ridderd deur keunegin Elizabeth II en mog sunt den sir nuimd worden. Hai kreeg ook de Franse onderschaaiden Legioen van Eer. In meert 2012 trad hai òf as lid van de road van bestuur van t team en nam dochter Claire zien stee in. In meert 2013 wuir Claire adjunct teamboas. In augustes 2020 wuir bekend dat t team verkocht was aan d’Amerikoanse investerensmoatschoppij Dorilton Capital. Noa de GP van Itoalië in september van dat joar trok de femilie zoch trugge uut de Formule 1.
Meer as n haalve aiw het Sir Frank Williams betrokken west bie de Formule 1, alhouwel de leste joaren nait meer as aktieve teamboas. De hoogtijdoagen van Williams F1 broken aan noa n zwoar ongeval dat zien aigen leven veraanderde. Dat taikent meschain wel t deurzettensverwogen van n man dij veur de sport leefde en ondanks sportieve en perzoonleke stoeregheden nait van opgeven waiten wol. Hai was n gelaifde en inspirerende figuur, zo as der nait veul in t F1-wereldje meer binnen. Mit Frank Williams het de Formule 1 n markante perzoon verloren.
Wèllen: Motorsport.com, Top Gear, Wikipedia
