Gruin gas geven (2)

Van nou òf aan kin k gruin gas geven, want mien nije auto is in de boane. t Was n put waark om hom van bedriefswoagen om te baauwen tot rolstoulbus, mor doar heb k den ook wat veur. Mainstekaans bin k nou aigender van n zeldzoam, zo nait uniek, vouertuug. Der zellen nait veul rolstoulbuzzen op gruingas in particulier gebruuk wezen. Tot zowied heb ik ze bloots zain as taxi-bus.

k Was al n zetje op t internet aan t strunen west noar aander auto’s. Nait zozeer uut noodzoak, mor wel om bie leutjen aan te bedenken wat n goie vervanger wezen kon veur mien vieftien joar olde Mercedes Sprinter. Via AutoScout24 en Mobile.de keek k benoam in Duutsland noar twijdehands rolstoulbuzzen, doar binnen ze mainsttied gekoper. Uutendelk heb k toch in Nederland vonden wat mie paast. Lesten jannewoarie kwam k via GasPedaal.nl uut bie n Fiat Ducato natural power.

Hai ston in Limbörg bie n autobedrief dij servicepartner van d’ANWB is. Via n konneksie bie d’ANWB kon k mie n goud beeld over d’auto vörmen, zunder dat k zulf hìngoan mos te kieken. Zo as de woagen mie beschreven wuir, leek e mie goud tou, dus heb k hom kocht. Tot mien gelok was e geschikt over te nemen: in Limbörg binnen der nog nait veul CNG-tankstoatsions en is de spraaiden doarvan ook nait recht gunsteg. Doarom konden ze d’auto nait zo makkelk in heur aigen kontraain kwiet, dat was veur mie goud veur de pries.

t Was dus n bestelwoagen mit dubbele kebine dij nog tot rolstoulbus ombaauwd worden mos. Bie mien aigen geroazieholder kon k hom veur t eerst in t echt bekieken. Toun was e van binnen al veur n groot dail stript veur t ombaauwen. De dubbelkebine-inbaauw (schaaidenswand mit achterbaanke) was der al uut en de loadruumte leegmoakt. De grode gastank lag eerst in t midden, onder d’achterbaanke, mor was al noar de ziedkaande verploatst. Aan de boetenkaande was e van kleur veraanderd. Onderlangs was e swaart, dat bleek n wrap te wezen. Doaronder was e blaauw. Konst op de lak ook nog òfdrokken zain van de bedriefsnoam dij derop stoan het: hai het van Ballast Nedam west.

De koale loadruumte was hoast kloar om in te richten. In t achterste dail mos n hemelbeklaiden moakt worden. Achter t holt op d’achterste ziedwanden is isoloatsiematerioal aanbrocht en t holt zulf kreeg n viltachtege beklaiden. Woar de dubbelkebine-inbaauw zeten haar, bleef n koal stuk bodem over, doar is n holtvlouer moakt. In d’achterdeuren zaten gain roeten, dij binnen derin zet. Vanzulf mozzen der nog n rolstoullift en n spanbandensysteem veur t vastzetten van de rolstoule inbaauwd worden.

Van boeten mos e ook wat minder bedriefswoagenachteg moakt worden. k Wil ja nait as baauwbedrief rondrieden, doarom is e onderlangs wit spoten. Wieder hof doar nait veul aan doan worden, bloots nog t aanbrengen van de finishing touch, mit nije wieldeksels en stickers van rolstoulvervoer. En n sticker dat k op gruingas rie, want as bewuste en betrokken Grunneger wil k ja gain eerdgas tanken.

Doarmit was e kloar om in gebruuk te nemen. k Heb n aanvroag lopen veur t specioale invalidentarief veur de wegenbelasten. t Is nog even wachten op de goudkeuren van de belastendainst, mor ik kin der al wel mit bie t pad. Nou kin k allenneg nait meer noar woarhaid zeggen dat ik n Mercedes mit sjefeur heb …