Licht veur de duustere doagen
k Heb n schiere cd wonnen bie Café Martini. Edwin Jongedijk was lestdoags te gast bie Radio Noord om n poar nummers van zien nije album Mörn Is t Weer Licht te speulen. Hai haar drij eksemploaren mitnomen om te signeren en vot te geven. Op Facebook ston n foto van Edwin, dij n handtaiken aan t zetten was in d’albumhoes, doar konden luusteroars op reageren. Ik heb schreven: ‘Edwin Jongedijk geft ons alvast licht veur de duustere doagen!’ Dat was ain van de drij schierste reaksies, dus ik haar wonnen. n Poar doage loater haar k de cd al in huus.
Mit Mörn Is t Weer Licht het hai n goud vervolg geven aan As Ik De Kaans Zol Kriegen. Net as mit zien debuutalbum uut 2011 ging n hitsingle veuròf aan de komst van de nije ploade. Mien Dörp ston dizze zummer al bovenaan in de Noord 19. De volgende nummer 1-hit is vervast in aantocht: Vief In De Mörn staait nou nummer aachte in d’aigenzinnege hitlieste van RTV Noord.
Volgens Edwin Jongedijk is d`inhold van Mörn Is t Weer Licht ‘verrazzend, mor vertraauwd’, mor is dat ook zo? t Verrazzende zit den nait in zien zang of zien gitoarspul, dij binnen nait aans as aans. Doarmit legt hai weer de neudege kracht en passie in zien laidjes.
t Album daankt zien titel nait aan n nummer, mor aan t gevuil woarmit Jongedijk zien teksten schrift. Veur dij teksten hoalt hai veul inspiroatse uut t leven, mit ook de minder schiere kanten doarvan, zo as (laifdes)verdrait, tegenslag en wìnsteghaid. Voak kommen de melancholie en t haartzeer uut de laidjes noar veuren, mor mainsttied wel mit t gevuil van t Komt Goud, wat de titel van ain van de nummers is. Hier binnen gain grode verrazzens te heuren, of t mout wezen dat de teksten smangs wat persoonleker binnen.
Zit t verrazzende den in de muzikanten dij mitwaarkt hebben aan t album? Mörn Is t Weer Licht is wat meer n bandploade worden as zien veurganger. Aan d´opnoames binnen meer repetietsies veuròf goan en de muzikanten haren meer aigen inbreng. Dat moakt wel n verschil: de laidjes klinken wat steveger en der zitten wat roegere randjes aan.
Noast zeuven aigen nummers stoan der drij covers op t album. Weer aine van Bob Dylan (Not Dark Yet is Nait Duuster Nog worden) en van twij van zien aandere muzikoale veurbeelden: Bruce Springsteen en Steve Earle. Edwin Jongedijk het der zien best op doan om doar wat aigens van te moaken. Ook dat verrast nait.
Goie artiesten willen zoch altied wieder ontwikkeln en pebaaiern van n nij album nog weer wat beters te moaken as van de veurege. Edwin Jongedijk het nait aans doan mit Mörn Is t Weer Licht. Veur mie is t gain verrazzen dat dit album n staarke opvolger is van As Ik De Kaans Zol Kriegen.
Eric, Jack, Selma en benoam Edwin, mien daank. k Loat dit album geern de duustere doagen veur mie verlichten. En d’aander winnoars, felesiteerd mit joen machteg schiere pries!
