Vervoaren

n Mìns wil wel es wat aans: n aander stee, de boudel vernijs inrichten, mit nije dingen begunnen, n vrizze kiek op de boudel kriegen. Ik was der wel n moal aan tou om dizze webstee te vernijen. Noar mien idee kon dat nait meer bie mien hosting provider van de leste joaren, dus bin k mit de webstee vervoaren goan.

n Joar of wat heb k mien webstee bie JouwWeb had. Doar kin je zulf n webstee moaken zunder kennis van programmeren in html. Ooit heb k doar wel de boasesbegunseln doarvan leerd, mor dat is n pìnze waark. En veur t schrieven van n blog bin k al best veul tied neudeg. t Was den ook wel gemakkelk om n webstee te hebben dij je mit n poar moesklikken opzetten en aanpazen kinnen. Boetendes worden doar automoatisch back-ups moakt en software-updates doan, dus heb je wieder gain waark om joen webstee goud aan d’loop te holden. Mor bie zo’n provider heb je wel wat bepaarkens in de vörmgeven en t inrichten van joen webstee.

k Heb de boudel nou onderbrocht bie KeurigOnline, n hosting provider in Stad. Doar draait de webstee nou op WordPress-software. k Heb eerder al n webstee had op dat systeem, mor k wol der toun vanòf, omreden dat doar teveul tied en muite in zitten om de boudel aan d’loop te kriegen en te holden. k Heb nou toch weer veur WordPress kozen, want bie KeurigOnline kin je gebruuk moaken van Installatron-software, dij vrijwel automoatisch WordPress of n vergliekboar systeem op de serverruumte installeert en ook back-ups en updates uutvoert. Zunder aal te veul ekstroa waark heb k dus nou n webstee op n professioneel systeem, dij mie meer meugelkheden geft.

k Haar wel n perbleem om de webstee van t tiedelke domein weer op mien aigen domeinnoam over te zetten. Dat kreeg k nait veur nander, dus heb k om acht uur soavends n mailtje stuurd aan de helpdesk van KeurigOnline om te vroagen hou k dat oplözzen mos. d’Aander dag smörgens veur negen uur haar k al n uutleg woar de fout zat en dat ze t al veur mie oplöst haren. Dat was n goie en snelle service van KeurigOnline. Doarbie bin k ook nog es gekoper uut as bie JouwWeb, zulfs nog as k loater meugelk nog n wat duurder pakket neudeg bin. En al is t mor n digitoale dainst, t geft ook wel n goud gevuil dat k n aankoop doan heb bie n lokoale ondernemer.

As je vervoaren goan, krieg je vanzulf weer n put waark om de boudel in te richten. Meschain haar de webstee wel in zien gehail overheveld worden kind noar mien nije serverruumte, mor ik heb derveur kozen om n poar vaste bladzieden en aal mien blogs handmoateg derop te zetten. Zo krieg k aal mien teksten weer es onder ogen om noa te kieken op toal- en schrieffouten en te zain of k der nog wat aan veraandern wil. Der zellen nog nije teksten bie kommen en n enkelde vaste bladziede goa k omvörmen tot n blog. t Waark is nog zekerwoar nait doan, mor mien nije stee is lös.

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *