Ede in de Top 2000
Vanmörgen om en bie 6 uur zel t Het Nog Nooit Zo Donker West van Ede Staal te heuren west wezen op NPO Radio 2. Hai is noamelk nij binnenkommen op nummer 476 in de Top 2000. Doarmit hebben n bult Grunnegers endelk heur zin kregen.
In 2007 is der al es n aksie west om te pebaaiern hom in dizze lieste te kriegen. Mit te groot sukses, Ede draaigde hoog in de Top 10 binnen te kommen. De zenderboas van Radio 2 het dat toun dwaarsboomd, deur aal stemmen op Ede te schrappen. De störm van kritiek vanuut Grunnen kon je aankommen zain: votdoadelk wuir Hilversum weer es beticht van Randstedelke arrogantie (wat ze schaande genog wel hebben) en hail veul Grunnegers vuilden zoch zowat persoonlek beledegd en diskrimineerd. Mor gain enkel woord van kritiek richten t Dagblad van het Noorden, dij d’omvang van heur lezerspebliek en de persoonlekhaidskultus rond Ede misbruukt hebben om de Top 2000 te manipuleren.
Dit joar het columnist Erik Hulsegge van RTV Noord dat nog es dunnechies over doan, mit as rezeltoat dat Ede nou in t bovenste vörrel van de Top 2000 te lande kommen is.
Wat zol Ede zulf vonden hebben van dat uutventen van zien meziek en van hom as artiest? Was e nait n anti-artiest dij wél geern laidjes schrieven en meziek moaken mog, mor der net zo laif nait mit noar boeten kwam? As Engbert Gruben hom nait overhoald haar, haar gainaine ooit van Ede Staal heurd. As hai van dat geleur mit hom waiten zol, zol e zoch omdraaien in zien graf? Wèl wait, as hai in 2007 op ons dele keken het vanuut t ‘paradise, where the devils and the angels comprise’, zol hai stiekem laagd hebben om zien diskwalifikoatsie?
Dat Ede deur normoal stemgedrag n stee in de Top 2000 krigt, is te verwachten. Mor gaait t bie aal dij stemmen wel om de woarderen veur dát laid dat al twijentwinteg joar ons aigen endejoarslieste Alle 50 Goud aanvoert? Ik heb op Facebook meerdere moalen t woord ‘proteststem’ lezen en uut reaksies op berichten moak ik op dat gounent zuver uut dwaarzeghaid dat laid invuld hebben en dat in ‘de kwestie 2007’ nog aal wat old zeer richten Hilversum zit. Net of ook doar n gevuil in zit van miskendhaid, dij de regionoale media ook wel geern n beetje aanslingern maggen.
k Heb niks tegen Ede en zien meziek, mor k heb der ook nait zoveul mít. Hai zit nait ‘in mien DNA’, wat Marcel Hensema mit zekerhaid maint te waiten over mie as Grunneger boven de 30 joar Doarbie erken k dat Ede veul biedroagen het aan de populariteit van t Grunnegstoalege laid en dat zien meziek veur n bult Grunnegers nog slim veul betaikent. Dus trek joe nait teveul aan van wat k hier schreven heb (of: loat mor plazen, wait nait beter). Luuster noar Ede zien meziek, vernuver joe dermit en woardeer hom om t gevuil dat t bie joe aanbrengt. En veur de volgende Top 2000: stem veuraal op dát laid dat joezulf t mainst aansprekt. Meschain komt Ede den wel voaker in de lieste te lande, al zel t nait zo hoog wezen.
