Cello, mor den aans
n Muzikoal verschiensel dat k wel interessant vin, binnen cross-overs tussen populaire en klassieke meziek. Dat kinnen optredens wezen van bekìnde artiesten mit n groot orkest, mor ook van klassiek geschoulde muzikanten dij heur aigen draai aan popmeziek geven. n Zet leden kwam k op YouTube n registroatsie van n konsert van 2CELLOS tegen, dij k ondertied al n poar moal bekeken heb.
De noam 2CELLOS zegt al dat je n duo van cellisten verwachten kinnen. Stjepan Hauser en Luka Šulić hebben heur oplaaiden in de klassieke meziek had. Ze treden elk veur zoch ook veul op in de klassieke meziek, mor mit heur baaident binnen ze n instrumentoale pop/rockband.
De uut Kroatië òfkomsteg manlu haren al op verschaaiden ploatsen in de wereld konserten geven, mor nog nait recht grode optredens in aigen laand. Op 3 juli 2013 gaven ze n konsert in d’arena van Pula, de Kroatische hoavenstad op t schieraailaand Istrië. Stjepan Hauser is n zeun van Pula, dus veur hom was t ook echt n thuusoptreden.
d’Arena van Pula is ain van de zes grootste nog bestoande Romaainse amfitheoaters en vörmt n schier decor veur zo’n konsert. Aan t inrichten van de bühne is doarom waaineg doan. Boeten stoulen veur de manlu binnen der twij grode videoschaarms en vanzulf installoatsies veur geluud en licht. t Is al wel te zain dat t nait n gewoon klassiek konsert worden gaait: op n verhogen achter de stoulen woarop Šulić en Hauser ploatsnemen, staait n drumstel. Luka Šulić zegt ook dat t nait n serieus konsert is. t Pebliek kin ontspannen, mag daanzen, zingen, springen, roupen en doun woar ze zin aan hebben.
t Begun is nijmoods klassiek mit Benedictus, n hymne uut de anti-oorlogsmis The Armed Man van de Welshe componist Karl Jenkins, dij overgaait in Where The Streets Have No Name van U2. In dij grode arena mit 6000 man pebliek waiten ze n intieme sfeer te creëren, woarbie de meer uptempo nummers bie leutjen aan opbaauwen noar wat groters. Via nummers van Green Day, The Magnetic Fields, Muse, (nog aine van) U2, Coldplay en Michael Jackson nemt de meziek tou in kracht, tot n punt woarop bliekt dat mit twij cello’s ook n Guns N’ Roses-nummer as Welcome to the Jungle overtugend te brengen is.
Bie Every Teardrop Is a Waterfall van Coldplay bliekt t duo n drijmanscbop te wezen. Onverwacht veur de YouTube-kieker wordt t drumstel bemand deur Dušan Kranjc, de vaste drummer bie live-optredens. Mit zien inbreng krigt de toch al krachtege meziek nog flink wat ekstroa sjars. Dat is ook t taiken veur t pebliek om noar veuren te kommen. Mit We Found Love van Rihanna wordt meer gasgeven. Den gruit t optreden uut tot n volledeg rockkonsert, mit meziek van The Prodigy, Racer X, Green Day, Nirvana en The Jimi Hendrix Experience.
Noa You Shook Me All Night Long van AC/DC is Stjepan inains even verswonden. t Pebliek wil vanzulf meer. Op d’eerste klanken van Highway To Hell komt hai den weer op, mit zien cello aan n tuugje veur t lief, zodat e zoch as n soort Angus Young onder de cellospeulers vrij over de bühne bewegen kin. Asof t den nog nait genog is mit AC/DC-nummers (nait wat mie aangaait), wordt doarnoa nog Back In Black inzet.
Den gaait de gang deruut, veur n rustege tougift, mit Californication van de Red Hot Chili Peppers en de Sting-nummers Fragile en Fields of Gold.
De cello is vanzulf benoam te heuren in de klassieke meziek en wordt ook wel in de popmeziek bruukt om n melancholische klank aan rustege nummers te geven, mor t instermìnt het veul meer in zoch. De manlu van 2CELLOS loaten zain hou krachteg en veulziedeg cellomeziek wezen kin en waiten t noar n hail nij nivo te brengen.
Bekiek hieronder de volledege registroatsie van 2CELLOS in Arena Pula van 3 juli 2013.
Bekiek ook: From Pula 2 Pula – The Journey of 2CELLOS
