Dat dut der nait tou

k Stoa in d’kraande. Lestdoags bin k deur DvhN-verslaggever Bouwe van Norden interviewd over t affeer woar k mit begund bin. Eergustern is t artikel verschenen. Der staait ain zin in dij noar mien idee overbodeg is: ‘Hij is door een handicap aan een rolstoel gekluisterd, maar dat hindert hem niet bij het computerwerk.’ Dat k in n rolstoule zit, dat kin je volgens mie wel oardeg dudelk zain. En t dut der hier nait tou.

k Heb den ook noar Bouwe aangeven, dat hai dat ook wel votloaten kind haar. Zien reaksie doarop was, dat t ‘n stukje human interest‘ is. Noar mien idee is t haile artikel human interest, omreden dat k bie de lezer introduceerd wor mit t waark dat k dou. Mor zien redeneren was dat lu zoch den toch òfvroagen goan: wat het dij jong den, dat e in n rolstoule zit? De tekst moakt heur nait wiezer as de foto, ze waiten bloots dat k n computer bedainen kin.

t Gaait dus over t waark dat k veur Kreuze dou, en dat staait vanzulf haldaal lös van mien spierzaikte. Der binnen lu mit n bepaarken (zo binnen ze nait aalmoal) dij ook over aander dingen proaten kinnen as bloots dij bepaarken. Woar meugelk mag je t van mie onbenuimd loaten.