Jongedieks eerste
Op d’óflopen Dag van de Grunneger toal kondegde Edwin Jongedijk al aan dat zien eerste solo-album uutkommen ging. t Is zien debuut as tekstschriever in t Grunnegs, want as veurman van de country-rockband Taneytown het hai al waark in t Engels òfleverd. n Officiële prezentoatsie is der nait west, mor veuròf aan d’uutgoave ston n stukkie in t Dagblad van het Noorden. Meer was ook nait neudeg veur dij op 19 meert bie zien optreden was. Dat was n schier veurpruifje van t produkt dat nou in de winkel ligt.
Zien eerste Grunneger tekst ontston op n miesderge zundag, toun e der nait uutkwam bie t schrieven van n nummer in t Engels. Toun schoot hom n Grunnegstoalege regel in d’zin en was der al gaauw n laid kloar. Der volgden meer en doar kreeg e zukse pozitieve reaksies op dat hai der eernsachteg mit aan d’loop ging.
Mit As Ik De Kaans Zol Kriegen scoorde Edwin Jongedijk vleden joar al n nummer 1-hit in de Noord 19. t Gelieknoamege album kin doar staarke opvolgers veur levern. Astoe Aan Mie Denkst staait alweer n week of wat in d’aigenzinnege hitlieste van RTV Noord.
Mitt twaalf aander nummers, staait t titellaid der twij moal op. d’Ingetogen live-uutvoeren van de Dag van de Grunneger meziek 2010 is ook nog uutwaarkt tot n krachtege popsong. Baaide versies kinnen goud noast nander bestoan, zunder nander geweld aan te doun. n Dubbelstaark nummer, dat t album veur n groot dail kerakterizeert. Mit zien donkerbroene, schuurpepieren stem zingt Jongedijk rustege ballads en stevege pop-rocklaidjes. Zien teksten binnen mainsttied wat melancholiek, over onvervulde wènstegheden, mor binnen nait swoarmoudeg. d’Örgelpertijen in t snellere waark geven n schier roeg raandje.
Zien aigen nummers binnen staark, mor ook de baaide covers klinken goud. t Komt meschain deurdat ik t originele Tomorrow Is A Long Time van Bob Dylan nait ken, mor Jongedijk zien Huuswoarts klinkt mie as n aigen nummer in d’oren. Bie Oadem Mien Oadem (in t Nederlands n hit van Peter Schaap) heb k dat gevuil nait zo, mor hai het der wel n schiere akoestische versie van moakt.
Jongedijk is n ‘allochtone’ Grunneger. Hai is geboren in t Nedersaksische dail van Vraisland, opgruid op Drìnte en tien joar leden deelstreken in Nij-Pekel. As e prat, heurst dat t Grunnegs zien moudertoal nait is. Mor as zanger het hai t zo stief omaarmd dast zien woare òfkomst nait opmaarkst. Bloots n enkeld woord zel t verroaden, mor meschain most dat wel as nijmoods Grunnegs zain. Toalen vernijen zoch ook ja aalgedureg.
Veur As Ik De Kaans Zol Kriegen het Jongedijk zoch beïnvlouden loaten deur zanger-laidschrievers as Bob Dylan, Bruce Springsteen en Neil Young. t Is n staark album dat wel es te groot wezen kon veur de pervinziegrìnzen. De Grunneger popmeziek het mit Edwin Jongedijk n goie vertegenwoordeger derbie.
