De Groot het niks te kloagen
De wolf is gewoonlek n groepsdaaier, mor gaait ook wel n moal allenneg op oaventuur. Vleden joar het Jan Henk de Groot de Troebadoers-roedel verloaten om zien daarde solo-album De Wolf Is Trug op te nemen. Veur de gelieknoamege theoatertoer is hai ook allenneg bie t pad. Op zien zwaarftocht deur t Grunneger theoaterlandschop (en zulfs doarboeten) kwam hai op zotterdag 7 meert in mien stamtheoater vanBeresteyn in Veendam.
t Was nait uutverkocht. Aiglieks zunde, want de beste Grunneger artiesten – woar De Groot zekerwoar aine van is – verdainen n groot pebliek. Mor van dij nood hebben ze bie vanBeresteyn n deugd moakt. De veurste riegen stoulen haren ze vothoald, zodat t optreden zoch veur t podium op de vlakke vlouer òfspeulde, op goud n meter òfstand van t pebliek. Dat zörgde veur n intiemere sfeer, wat t persoonleke kerakter van zien laidjes en verhoalen meschain nog wel beter uutkommen luit. Biekommend veurdail veur mie was dat ik eerste rang zat.
Hai gaait mit zien cd verschaaiden muzikoale richtens op, mit invlouden van o.m. blues, rock, country en folk. Up-tempo nummers worden òfwizzeld mit gevuilvolle, intieme ballads. In Harmen Ridderbos (Town Of Saints) zien studio en mit n stel goie muzikanten is van De Wolf Is Trug n kwalitatief staark album moakt. Ook in n akoestische setting kin JH dij veulziedeghaid en kwaliteit vastholden. Zochzolf begelaaidend op gitaren, vleugel en ukelele en tussen de laidjes deur persoonleke verhoalen vertellend, boeit e van begun tot ende.
Jan Henk de Groot het niks te kloagen, of toch wel? Dik n joar leden leek t nait zo goud te goan mit zien gezondhaid. Doar vertelt hai over in de veurstèllen. Doar was Jacques d’Ancona nogal kritisch over. Dij schreef in oktober, noa de première van De Wolf … in Delfziel, dat je t pebliek nait lasteg valen mouten mit medische problematiek. Doar was op dizze oavend in Veendam gain sproake van. En woarom ook, De Groot zel zulf gain verlet hebben van n twij uur durende kloagzang, want t leven bestaait uut meer as liggoamelk ongemak (neem dat mor van ondergetaikende aan). Zien toustand bleek uutendelk tou te valen, mor t was veur hom wel n taiken dat e zien leven drastisch omgooien mos. Hai ging gezonder leven o.m. deur fanatiek aan t haardlopen te goan. In Stap Veur Stap vertelt hai doarover op n luchtege menaaier. t Ligt veur d’haand dat t n up-tempo nummer worden is. Op de cd gaait t zulfs in de richten van folk-rock.
In t leven mout je ook genog tied veur joezulf nemen, den krieg je wel es n vrizze kiek op de zoaken. In Zin Aan let hai de boudel even zo as t is om n weekje noar Schier te goan. t Is nait per se n sukses, hai wordt zulfs ‘muid van ale rust’. Gelukkeg krigt de muzikant in hom weer de neudege inspiroatsie. JH geft meer inkiekjes in t leven van n muzikant: zo zingt hai dat e zoch n Nije Gitaar kocht het (hai het ja ook mor n poar … toch?). In Spiekerboor dut hai t verhoal over hou hai n suksesvolle Grunneger artiest worden is. Net as bie d’Amerikoanse blueslegende Robert Johnson het de duvel zien pad kruusd. In dit geval lag de crossroads bie Café ‘t Keerpunt in t Drìntse dörp.
Mit de nostalgie van n vatteger vertelt en bezingt hai ook veul persoonleke verhoalen uut zien jeugd. In 101 dalmatiners gaait t over Bobo, d’hond woar de leutje Jan Henk te vroug òfschaaid van nemen mos. ‘Bobo was B.A. / Mor zulfs The A-Team kon niks doun dou ze van dokter n spoitje kreeg’. t Laid Satelliet gaait over zien jeugdege fantasie om t eerdse bestoan te ontvluchten. Meschain dat Han Solo uut Star Wars hom wel mitnemt in de Millennium Falcon. In dizze meer intieme setting zol je nait verwachten dat d’elektrische gitaar op batterij komt, mor toch staait de rocker in JH ook even op. Hai bezingt zien verkerentjederij mit n wichtje dij fan was van The Cure. Zai von dat hai sprekend leek op Robert Smith, zanger van de Britse band. t Nummer bevat tekstuele verwiezens noar t repertoire van The Cure.
t Laid Oma Siepelsjuu, ain van zien nummers van de Troebadoers-cd Onbekìnde Wegen, verbindt zien jeugdherinnerns mit de tegenwoordege tied. De jongste generoatsie krigt aandacht mit n laid over zien dochter Myrthe, dij veur t eerst allenneg Noar Stad gaait.
De wolf komt veur in sprookjes en mythologische verhoalen, dij de fantasie aanspreken en woar voak ook n levensles inzit. Jan Henk de Groot het zien wieze lezzen mit ons daild en ons mitnomen in zien fantasie. t Leven zit vol verhoalen dij verteld worden mouten. Dat is t idee achter De Wolf Is Trug en dat is woar JH, as Troebadoer of ainzoame wolf, goud in is.
Jan Henk de Groot het niks te kloagen. Hai het meer zin in t leven en is muzikoal goud aan d’loop. Zien cd De Wolf Is Trug het hom positieve kritieken aanbrocht, o.m. van Radio 1-prezentoator Frits Spits. Mit de biebeheurende veurstellen het JH ook weer es zain loaten dat hai bie de beste zanger-laidschrievers in de Nedersaksische streektoal heurt. t Veendammer pebliek haar dus ook gain reden tot kloagen.
