Gadderbouk

Jan Glas is nait dood. Doarmit vertel k joe, gelukkeg, gain biezunder nijs. Mor zoveul Grunneger dichters is t nait bie leven gund dat aal heur waark bie nander gadderd wordt in ain bouk. In de verzoamelbundel (mag k dat n gadderbouk nuimen?) Dubbel Glas – Ale gedichten binnen de twij uutverkochte bouken De vangers van Zummer en Het getal Hondje soamenbrocht. Wieder staait der waark in uut Zo is t nait goan, omtoalens van Rilke uut Sieben Nedersaksisch en nog wat nij waark. In t bouk stoan ook swaart-wit foto’s dij deur Glas moakt binnen.

Jan Glas het in t Nedersaksische toalkontraain al grode literaire priezen uutlangd kregen. In 2006 kreeg hai veur De vangers van zummer de Literaire Pries van Stichting t Grunneger Bouk, in dat joar won hai ook de Freudenthal Pries mit vaar nije gedichten. De DvhN Streektoalpries 2006 was ook veur hom, as ain van soamenstellers van De 100 mooiste Groningse gedichten. In 2008 kreeg Glas t Belcampo stipendium uutlangd.

Zien gadderbouk het hom dit joar vernijs de DvhN Streektoalpries in de kategorie poëzie en proza aanbrocht. Lesten april mog e de pries in ontvangst nemen.

Glas mag n ambassadeur van d’hedendoagse Grunneger poëzie nuimd worden, want ook boeten ons pervinzie krigt e aandacht. Aankom juni nemt hai dail aan t 44e Poetry International Festival in Rötterdam, woar e ook uut zien Grunnegstoalege waark veurdroagen zel.

Jan Glas en zien uutgever Kleine Uil binnen bie de tied, want Dubbel Glas is, hail nijmoods, ook te verkriegen as e-book. Dat kon wel es n nijloodje wezen in de Grunneger literoatuur.

Jan Glas kin n braid pebliek aanspreken en dat is goud veur de Grunneger toal.