Gewoon superfood
Om nog rechtstreeks de Formule 1-races zain te kinnen, mos k twij joar leden veur nood digitoale tv nemen. As gevolg doarvan kreeg k der vanzulf ook n riege zenders bie woar nait veul biezunders op te zain is. Bie n verveeld rondje zappen kwam k op de Nederlandse kookzender 24 kitchen te lande, middenin n pergram van de Britse tv-kok Jamie Oliver. Deur zien passie en enthousiasme, en deur de smoakelke menaaier woarop t aal in beeld brocht wuir, bin k derbie hangen bleven. Sunt den heb k sikkom aal zien pergrammen zain, smangs zulfs meerdere moalen.
Noa de daarde herhoalen van de riege Jamie’s Super Food heb k mie t biebeheurende kookbouk kocht, in de Nederlandse vertoalen Jamie’s super food voor elke dag nuimd. Hierin geft Oliver zien aigen kiek op t verschiensel superfood. Gezond wezen en joe goud vuilen begunt bie joen doagelks eten, doar bin je echt gain alternatieve diëten veur neudeg mit goji-bezzen, chia-zoad en aander hippe, duurbetoalde dingen van de drogist of reformwinkel. Mit de doagelkse bodschoppen dij gewoon in de supermaarkt te hoalen binnen, kom je al n hail ende. Deur t loos kombineren van inholten kin je lekkere en gezonde moaltieden moaken, woarmit je wat van aal belangrieke voudensstovven binnenkriegen.
In apaarde heufdstukken geft hai verschaaiden resepten veur ontbijt, lunch, diner, snacks en drinkerij. Elk resept is in heldere toal beschreven. Onderaan de bladziede staait n dudelk overzicht van t aantal kalorieën, de voudensweerden (vet, verzoadegde vetten, aaiwit, koolhydroaten, suker en vezels) en de tied dij je neudeg binnen om t te moaken. Voak binnen wel veul inholten neudeg veur ain gerecht. Bie elk gerecht staait n smoakelke foto, dij nuigt om t te moaken en te eten.
In de veurberaaidens op t bouk bezöchtde Jamie Oliver n aantal steeën in de wereld woar lu t gezondst binnen en t laangst leven: o.m. t Griekse aailand Ikaria, t Japanse aailand Okinawa en t Costa Ricaanse schieraailand Nicoya. In aal dij kontraainen bestaait t eetpetroon uut veul gruinte en fruit en waaineg vlaais. Dat is den ook de boases veur de resepten in dit bouk. Hai legt ook uut woarom gruinte en fruit t beste uutgangspunt veur t eetpetroon binnen. Wieder gaait hai in op t belang van koolhydroaten, zuvel, wotter drinken en verantwoord eten inkopen. Bie n gezonde menaaier van leven is goie nachtrust ook belangriek. Doarom is der ook n parregroaf over sloapen en de invloud dij eten doarop het.
t Eerste resept dat k moaken loaten heb, was fagioli fusilli mit praai, artisjok en lauriereulie. Doar heb k nog n wiedere superfood-draai aan geven, deur pasta van kikkeraarten te bruken (telt dat ook as portie gruinte, mister Oliver?). Ik kin nait zo goud over gewone pasta woar waaite in zit. Dat kin zwoar wezen veur moage en daarms as je, zo as ik, n zittend leven hebben zunder liggoamsbewegen. Dij kennis heb k den weer uut n aander bouk.
Verschaaiden foodbloggers, recensenten en fans van Jamie Oliver waren wel verrast (en nait aalmoal positief) dat hai zoneudeg mitdoun mos aan de superfoodhype. Gounent vonden t n tegenvaler van de tv-chef dij eerst en veuraal vindt dat je van eten genieten mouten. Mor dat kin ook op n verantwoorde menaaier, zunder dat t onneudeg stoer en duur wordt. Mit de resepten uut Jamie’s super food voor elke dag as inspiroatsie is t meugelk om meer òfwizzeln en alternatieven in t eetpetroon aan te brengen. Zo moak je joen doagelkse eterij tot superfood.
