Grootse vieren

Bosklopper Bokoal – foto: RTV Noord

De Grunneger meziek leeft, zit in de lift zit en verdaint t om nog meer aanpeerdjed te worden. Zo is t al joaren en dat wuir vleden joar nog mor es onderstreept deur t eerste Bosklopper Gala. t Feest rond de verkaizen van de beste Grunnegstoalege single beleefde nou zien twijde editie. Ook diskeer was t n grootse vieren van t Grunneger laid.

Onder laaiden van Marcel Wolthof en t Groot Van Beresteyn Orkest traden n aantal nait genomineerde artiesten op: Harry Niehof, Harbert Grezel en Gerry Wolthof. Veur Gerry Wolthof, dij gewoonlek zingt in t Engels, was t weer es n betuun uutstapke in t Grunnegstoalege. Meschain mout e doar wat meer mit doun. Tussen de muzikoale gasten deur muik Bert Hadders de nominoatsies bekend. In 2017 is weer n grode verschaaidenheid aan meziek in de streektoal verschenen. De kwaliteit is over t algemain hoog. Hadders het de Bosklopperbokoal in t leven roupen om tot nog betere meziek te kommen en dat was dit joar al te maarken.

De genomineerde nummers en artiesten:
Evenwicht – Jan Henk de Groot
Stilstoan Is Mien Wins – Edwin Jongedijk en Arjan Vanderlinde
Funky Vouten – NulViefteg
Waarkhanden – Marlene Bakker
Wie Waren Jong – Fries Wolma
Sjomp! – Wat Aans
Ze Is t Padje Kwiet – Mark Brinkhuizen
Vera’s Kelderbar – Arnold Veeman
Kom Even Bie Mie Zitten Op n Baankje – Maas en Folgerts
De Moat is Vol – Dion Bouwes

Marlene Bakker, Wat Aans! en Nulviefteg-veurman Alex Luttjeboer brochten heur nominoatsie live te heuren.

Vleden joar waren vief laidjes nomineerd veur de deur de vakjury uut te langen Bosklopperbokoal en t biebeheurende bedrag van € 1000. Mit vief aander laidjes muiken ze den nog kaans op de pebliekspries, de Bé Wever Beker en € 500. Dat was nou aans: elk laid kon baaide priezen in de wacht slepen. Veur de Bé Wever Beker kon veuròf aan t Gala stemd worden via de webstee van RTV Noord.

Dik 2000 kiekers en luusteroars hebben bepoald dat Wat Aans! de Bé Wever Beker kreeg veur Sjomp!. n Goud vervolg op vleden joar, toun ze baaide priezen wonnen veur Trilploat. Ik heb stemd op n nummer dij k nait zag as grootste kanshebber veur de pebliekspries, mor wel veur de Bosklopperbokoal. En zo is t ook uutkommen. Volgens de vakjury was t stoer west om de winnoar te bepoalen, mor t oordail was dudelk: Waarkhanden van Marlene Bakker is kwalitatief van n nivo dat nog nait eerder hoald is in de Grunneger meziek. Doarmit is t terecht t winnende nummer.

De zoal was nait vol, volgens Bert Hadders zol dat wel kommen deur de griep. Zol t zo wezen, of maint t pebliek dat t n besloten feessie veur t Grunneger meziekwereldje is? Zai t meer as n schier konsert mit n verschaaidenhaid aan goie artiesten. En slim veul gala is der nait aan: t mag wel n rooie-loper-feest mit brobbeltjeswien wezen, huifst nait in smoking en laank klaid op batterij kommen. De dresscode is sundoags goud, veur gounent betaikent dat n slobbertrui en n spiekerboksem. Aander joar loat k mien strikke ook mor in d’kaaste liggen.

k Bin nait bleven veur de afterparty, mor VanDeStraat, de beste Grunnegstoalege coverband (meschain ook wel d’ainegste), het t feest vervast nog n goud vervolg geven.