Gruin gas geven

Fiat Ducato natural power – foto: Bert Wijnholds

k Koop mie n aander auto. Mien Mercedes Sprinter kin technisch nog wel n zet mit, mor t onderhold en t veurkommen van rost goan meugelk te duur worden. Doarbie, hou laank mag k nog mit n 15 joar olde diesel de stad in? In Nederland binnen al steden woar ze oldere diesels uut de binnenstad weren. As t hier ook zowied komt, krieg k der bekeurens as kostenpost bie. n Onthevven zel je vervast nait kriegen kinnen. Mor den zol t ook geld kosten goan.

Op diesel rieden kin veur mie aiglieks al nait meer uut, doar mos n alternatief veur kommen. Der komt nou n Fiat Ducato natural power, n bus dij op CNG ridt. CNG betaikent Compressed Natural Gas oftewel (duur k dat wel zeggen?) eerdgas onder druk. Veurdat je mie aan de schandpoale noageln willen, of mit pek en veren tot de pervinzie uut trappen: dat goa k nait tanken. As je n beetje n betrokken Grunneger binnen, kin je dat vanzulf nait moaken.

Veur CNG is n goud alternatief in de vörm van gruingas. CNG is wel n schone brandstof dij veul minder uutstöt geft van fienstof, NOx en CO2 vergleken mit bezine en diesel. t Is ook n veurdailege brandstof. t Het as noadailen dat t net zo goud n fossiele brandstof is – en dus ooit n moal op is – en dat de winnen van gas n gevoar is veur lu dij der bovenop wonen. Doarom mout je kaizen veur gruingas as duurzoam alternatief. Gruingas wordt moakt deur biogas (n produkt uut o.m. slib, òfval van störtploatsen, GFT en mizze) te zuvern en te dreugen en doarmit op te woarderen tot eerdgaskwaliteit.

In Stad is gruingas bie twij moatschoppijen te koop: bie PitPoint tank je CNG aan de pombe en wordt op verzuik t getankte aantal kilo’s CNG omzet noar gruingas, d.m.v. n ‘groengas-certificaat’. Joarleks nemt t aandail gruingas bie PitPoint tou mit 5%. Zo zellen zai binnenkört bloots nog gruingas levern via heur CNG-stoatsions. Bie OrangeGas binnen ze al n stap wieder: bie aal heur tankstoatsions is allenneg mor gruingas verkriegboar. In de pervinzie kin je tanken bie OrangeGas in Zuudbrouk en bie Holthausen op t Hoogezaand. Op t Knoal schient eerdoags ook aine te kommen.

k Heb gain kant-en-kloare rolstoulbus kocht, dij binnen mainsttied nait te betoalen. De Fiat is nou nog n bestelwoagen mit dubbele kebine en mout nog aanpaasd worden mit o.m. d’inbaauw van n lift en n spanbandensysteem veur t vastzetten van de rolstoule. k Hoop dat k der gaauw mit bie t pad kin. Mor k kin den nait meer zeggen dat ik n Mercedes mit sjefeur heb …