(On-)Grunnegs goud

RAIF, Marlene Bakker – foto: Bert Wijnholds

Smangs mot je votgoan om joezulf te vinden. Marlene Bakker het Grunnen ooit verruild veur Tilbörg om n oplaaiden te volgen aan de Fontys rock-akkedemie. En dat het goud west, want t het heur wat aanbrocht: nait allenneg n dege ontwikkeln tot popmuzikante, mor ook n besef van heur Grunnegs-wezen, heur verbondenhaid mit de Grunneger grond, de lu en de toal. Dat komt aal bie nander in heur Grunnegstoalege debuutalbum RAIF.

Dit bleek al bie Waarkhanden, d’eerste single dij vleden joar verscheen en n veurbode was van wat nog kommen ging. t Laid gaait over weeromgoan noar woar joen worrels liggen, noadat je votwest binnen. Wìnsteghaid en angst om weer te keren kommen nander in de muide in t laid. De magie van heur zo gelaifde Westerwolle klinkt deur in de dreumerge klanken van n striekerskwartet. t Arrangement geft n filmisch karakter aan t nummer. Mit de videoclip dij opnomen is in Smilke, vörmt t n mooi eerbetoon aan t stee woar Marlene opgruid is. De pracht en kracht van Waarkhanden hebben heur al sukses aanbrocht, ze kwam op nummer aine in de Noord 9 bie RTV Noord en won de Bosklopperbokoal veur beste Grunnegstoalege single van 2017.

Mit n waarm stemgeluud as heur raif en poëtische teksten, ondersteund deur sfeervolle meziek, loat Marlene Bakker heuren dat t Grunnegs gain haarde, raauwe toal is. Al in t eerste nummer Raif bliekt heur verbondenhaid mit dij toal: ‘n Toal as raif / Klinkt mie vremd en bekend‘. Zo as zoveul Grunnegers van heur generoatsie het Marlene as kind de Grunneger toal nait aktief leerd, mor is ze der wel mit in aanroaken west. In heur tied in Tilbörg is de woarderen veur de toal pas kommen deur t luustern noar Ede Staal.

De mainste nummers op t in aigen beheer uutgeven RAIF binnen van aigen haand. De tekst van Heufd As Helm is n bewaarkt gedicht van Fieke Gosselaar en Doe Waist Beter is n cover van You Know Better van de Deense zangeres-laidschriefster Tina Dico. De rest van de teksten het Marlene veur n groot dail zulf schreven. Toun ze in 2012 mit Te Nuchter in t Grunnegs begunde, was ze nog hulp van dichter Jan Glas neudeg om tot n goud geve tekst te kommen. In 2013 won ze mit heur tekst van Smilke de daarde pries in de Grunneger Schriefwedstried. Ain regel doarin was toun ‘boeten zweeft n ballet vlaigen’, wat toalpuristen gain goud Grunnegs vinden. Dat is nou veraanderd in ‘boeten zweeft n ballet neefkes’, dat is in elks geval schierder Grunnegs. t Schrieven gaait heur aal beter òf, mor veur de zekerhaid het ze de teksten noakieken loaten deur leroar Grunnegs Hindry Schoonhoven.

Marlene het gain haalf waark moakt van heur debuutalbum. Ze het n goie ploug mìnsen om zoch tou gadderd om t beste uut heur meziek te hoalen. Bernard Gepken (n muzikoale pazzipant van o.m. Daniël Lohues) wos as producer t album noar n hoger plan te tillen. Hai is ook ain van de muzikanten dij RAIF inspeuld hebben, mit Reyer Zwart, Nicky Hustinx en Arjen de Bock, dij al mit verschaaiden artiesten soamenwaarkt hebben. Reyer Zwart is doarnoast verantwoordelk veur de striekersarrangementen. De zang en meziek binnen in meerdere studio’s opnomen en veur t òfmixen van RAIF is de raaize moakt noar de vernuimde ICP Studio’s in Brussel, woar al veul toppers uut de Nederlandse popmeziek west binnen.

t Het n haile zet duurd veurdat dit album uutkwam. Der is om en bie twij joar aan waarkt, mor dat was t wachten weerd. RAIF het n grotere kwaliteit en allure as wat tot zover verschenen is in de Grunneger meziek. Doarmit het Marlene Bakker n nije moatstaf zet, meschain wel veur t gehaile Nedersaksische toalkontraain. Grunneger artiesten hebben nog altied gain landelke bekendhaid. Zol Marlene Bakker dat deurbreken kinnen? Ze verdaint t in elks gevaal mit RAIF, dat n (on-)Grunnegs goud album is.