Harry´s ommelandse raaize

Zanger-laidschriever Harry Niehof is begund aan zien eerste toer langs de theoaters in de pervinzie. Gusteroavend was d’eerste veurstèllen van Van Middelsom Noar Madrid in De Molenberg in Delfziel.

Theoaterdirekteur Daniël Wever wol zien pebliek n konsert veurschuddeln, zo as dij nait eerder deur n Grunneger artiest geven was. Net zukswat as Daniël Lohues zien Allennig-riege. Harry Niehof von t n goud idee, mor wol den wel n braider geluud delezetten. Doarveur ruip e de hulp in van zien muzikoale pazzipanten, bassist Johan Viswat en multi-instrumentalist Herman Grimme. Mit sikkom dichterleke teksten beweegt de zanger-laidschriever zoch tussen folk en blues, woarin smangs wat jazzy geluden of spoansachtege gitoarklanken lieken deur te klinken.

In de theoatershow vertelt Harry Niehof over zien geboortestee Middelsom, zien tied in de ‘wereldstad’ Stainwiek en in Grunnen. De zuiktocht noar perfectie, dij tekst mit waaineg woorden dij t aal zegt, dut hom in Spanje belanden. Juust doarzoot, woar d’inwoners onverwacht veul op ons Grunnegers lieken, ontdekt hai zien muzikoale worrels en ontstoan zien eerste nummers in de Grunneger toal.

Hai verbindt de laidjes mit anekdotes en onderkoulde humor. Uut n kõrde, simpele, mor geweldege act over daanzen op zien Grunnegers, bliekt mor weer wat veur swingend volk wie toch aiglieks binnen.

Dizze theoatertoer was n mooie gelegenhaid veur t opnemen van n nije cd. t Wuir zulfs n dubbelalbum, Golf Noa Golf, dat gusteroavend ook zien debuut beleefde. De doarvan òfkomstege single Begun is al n sukses, dij staait nou net bie Radio Noord op nummer 1 in de Noord 19. Tegenstriedeg aan de titel wordt t nummer pas aan t slöt brocht. Der wordt n wenden aan geven, dijst nait aankommen zugst of heurst.

Boeten Grunnen is de meziek van Harry Niehof nog mor zuneg bekend, mor verdaint t zeker om heurd te worden. Bie ons het hai ondertied de weg noar de grotere podia vonden.