Goud geld

De koartjes waren steveg aan de pries, mor doar heb je den ook wat veur. En je doun der ook nog wat gouds mit. In theoater Van Beresteyn in Veendam wuir n benefietkonsert holden, ten behuive van de Stichting MS Research.

t Konsert wuir organizeerd op verzuik van de gemainte Veendam, dij veur t nije OV knooppunt in d’olle Jonkerloodse n kunstwaark aankocht het. t Beeld L’Incontro (Italioans veur ‘de ontmoeting’) is n waark van beeldhaauwer Wim Steins, in 2005 specioal veur Stichting MS Research moakt. t Ston eerder in de hal van t centroal stoatsion van Utrecht. d’Opbrengst van dij aankoop komt ten goude aan de stichten.

t Was geliek ook n staarke opening van t theoaterseizoen in Veendam, invuld deur Voorheen De Bende mit Pazzipanten. t Gezelschop is bie veurboat al n gerantie veur n plezaaierge oavend en dat was t ook. De beste laidjes van de sikkom-volledege Bende (allenneg pazzipant Harry Niehof was der nait bie) en ook dij van Pé en Rinus as duo, wuiren uut volle borst deur t pebliek mitzongen.

De veurstèllen was ook in financieel opzicht gesloagd te nuimen. Deur de belangeloze mitwaarken van Van Beresteyn, d’opbrengst uut de koartverkoop en n biedroage van sponsor Nedmag kon n cheque ter weerde van 16.000 euro aan de stichten uutlangd worden.

Aiglieks mouten ze elk joar n benefiet holden mit Grunneger meziek, den dou ik ook nog es n moal wat gouds veur de medemìns.