Josien het de toukomst

Grunneger Laidjesfestival 2020, Josien Bakker – foto: Bert Wijnholds

As in Twij deuntjes veur ain cent jeugdege artiesten te heuren binnen, worden dij deur Henk Scholte steevast ‘t pootgoud van de Grunneger meziek’ nuimd. De nije aanwas bestaait de leste joaren mainst uut artiesten dij al (veul) langer aan d’loop waren in de meziek, mor pas loater t Grunnegs as zingtoal omaarmd hebben. Jonge artiesten dij al vanòf t begun in heur aigen toal zingen, binnen mor betuun.

De 17-joarege Josien Bakker uut Vlagtwedde is zo aine. Veur heur zesde verjoardag kreeg ze n gitoar en toun ze negen joar old was d’eerste zangles. In meert 2019, nog veur heur vieftiende verjoardag, trok ze d’aandacht die de Grunneger Weke in de gemainte Westerwolde, woar ze bestoande nummers zong dij ze zulf noar t Grunnegs omtoald haar. Doarnoa het ze al verschaaiden meziek- en clipopnoames doan, was ze te gast bie radio- en televisiezenders en het ze al bie verschaaiden gelegenheden optreden.

Ook in 2019 muik Josien al heur eerste aigen nummer mit volledeg zulf schreven tekst en meziek. In n uutzenden van Radio Westerwolde woarin ze te gast was, wuir zegd dat der aiglieks gain nummers in t Grunnegs waren over de Dodenherdenken. Dat het heur geliek tot schrieven aanzet en zo is Omdat Ik Die Mis ontstoan.

In 2020 won Josien t Grunneger Laidjesfestival, ze mog zowel de jury- as de pebliekspries in ontvangst nemen. Doarmit won ze ook n ploatopnoame. De twij nummers, ook zulf schreven, dij ze zongen het op t festival binnen doarbie op cd zet, en dij is nou verkriegboar. Mit n heldere stem, n dudelke uutsproak en goud Grunnegs brengt ze de laidjes te heuren. Ken Ik Die Weer gaait over gemis en uutkieken noar n weerzain. In Gewoon Josien stelt ze zochzulf veur as ‘n apaarde trien‘.

Josien hoopt nog veule joaren in de meziek deur te goan, zo staait te lezen op heur webstee. Hopelk het ze zo’n lange loopboan in t veuruutzicht dat ze ooit de grand old lady van de Grunneger meziek nuimd wordt. Dij officieuze titel mag nou voerd worden deur Lianne Abeln. Veur Josien zowied komt, mout ze nog tientallen joaren mit. En dat zol mooi wezen. Want zolaank Josien Bakker de toukomst het, het de Grunneger meziek dat ook.

Webstee Josien Bakker: https://www.josienbakker.nl/
Josien Bakker op Facebook: https://www.facebook.com/josien.bakker.73
Josien Bakker op Instagram: https://www.instagram.com/josien_bakker/
Josien Bakker op YouTube: https://www.youtube.com/channel/UC3UWLPd-IhEl5iTijQzBSBA

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *