Grunneger legendes goan weer lös

Pe & Rinus Goan Weer Lös – foto: Pe & Rinus

Pé Daalemmer & Rooie Rinus, doar kom je nooit van òf, schreef k bie heur dattegjoareg jubeleum. En gelukkeg nait. Dat is alweer elf joar leden. Vleden joar was t dus heur vattegste. Doar konden ze toun nait recht wat mit doun (iets mit n virus, ofzo), mor t mos toch n moal vierd worden. Mor we kinnen weer lös, en ons markante duo dus ook.

De toer dij ze langs verschaaiden theoaters en kefees in Grunnen en Drìnte brengt (en tussendeur nog even Op verziede in Waskemeer) hait den ook Pé & Rinus Goan Weer Lös!. En lös goan, dat kinnen ze nog altied: t was weer feest in De Meulenbaarg in Delfziel, woar ze weer es mit n begelaaidensband op de bühne stonden: De Containers waren derbie in n nije bezetten, mit old-Container Herman Grimme as toetsenist en Containers 2.0 Mervyn Gerds op bas en Jetse Goris op drums.

De manlu kieken vanzulf weerom op heur carrière, mor loaten ook blieken nog aal bie de tied te wezen. Zo binnen der weer es nije laidjes schreven en n aantal oldern noar t heden aanpaasd. Bie t begun van t optreden mozzen eerst ekskuses aanboden worden veur d’originele tekst van Plattelandsvrouwen. In dizze tied van #MeToo kin dat echt nait meer. Deur dij nije bewustworden zagen ze zulf ook in dat ze n aander tekst schrieven mozzen, mor doarover loater meer. Gelukkeg is Delfziel nog nait zo woke, dus ze kon hier d’olde versie nog wel n moal te heuren brengen.

Vleden joar mos hoast elkenaine thuuswaarken (iets mit n virus, ofzo). Doar kwam bie Pé & Rinus nait zoveul van terechte. Gelukkeg laaidde dat waarkontwiekend gedrag wel tot n aantal verfrizzende nije laidjes. Ochtendzon gaait over dat waarkontwiekend gedrag. t Socioale leven speulde zoch veul meer online òf, dat het de manlu meer Cyber Algoritme Blues bezörgd. Rinus kreeg last van online agressie, dat gaf inspiroatsie veur (Wat is er mis met een lekkere) Doodsbedreiging.

n Aantal oldere hits binnen dus weer bie de tied brocht. Veur Plattelandsvrouwen mos dus n nije tekst schreven. De 3.0-versie is nou haldaal 2020 en coronaproof. In Hoornse Plas is aspirine vervongen deur hydroxychloroquine en ridt der vanzulf weer n aander busbedrief deur Stad. t FC Grunnen-laid Z-Side ging over voetbalagressie. Mor ook hooligans zellen wel es beschoafd worden. De meziek is nou n stuk rusteger moakt, mor uut de tekst bliekt n onverminderd fanatisme … toch?

Tussen t zingen deur gaf Pé nog n spreekbeurt om uut te leggen hou dat nou zit mit de Spar, de T-shirts en de pinda’s. Sunt n optreden op Rapaljes Zomerfolkfestival in 2015 hebben ze ook n nummer Pinda’s Van De Spar, noa zo’n verheldernd college kon d’uutvoeren van dat laid nait achterwege blieven.

Houveul jubeleums zellen Pé & Rinus noa dizzent nog vieren? As je zain mit houveul lol ze nog aal op t podium stoan en hou populair ze nog binnen, huift dit de leste nog nait wezen. Muzikoal blieven ze bie de tied, terwiel dat d’olle nummers onderdail van ons Grunneger kultureel aarfgoud binnen. Pé & Rinus kom je nooit vanòf, mor wèl zol dat ook willen?