Krödde 30 joar

k Bin op verjoardag west. t Grunneger tiedschrift Krödde bestaait datteg joar. t Feessie wuir vierd bie t Huus van de Grunneger kultuur. k Was gain abonnee, mor de redaksie van Kreuze was nuigd. Mien co-redakteur Henk de Weerd kon t nait wachten, mor ik ging der maank.

d’Oavend wuir prezenteerd deur Henk Scholte, konsulent van t Huus van de Grunneger kultuur, dij nait allenneg de joarege felesiteerde mit t heugelke fait, mor ons aalmoal as laifhebbers van de Grunneger toal en/of abonnees van Krödde.

Verschaaiden uut Krödde bekende schrievers en dichters lazen veur uut t waark dat ze in d’loop van de joaren in t blad publiceerd hebben. Aly Freije, Hanne Wilzing, Henk Puister, Willem Tjebbe Oostenbrink, Lammert Voos, Chris Kiel, Fieke Gosselaar, Jurrien Veenstra, Jan Siebo Uffen en Nina Werkman haren elk t schierste uut heur schrieverij uutkozen om aan ons veur te droagen.

Der was n biezundere muzikoale biedroage van Hendriktje Ruiter, n in Winschoot geboren zangeres dij meziek moakt in de sfeer van de Portugese fado, mit teksten in o.m. t Grunnegs.

Noa òfloop moggen aal de gasten vergees t dubbeldikke jubeleumnummer mitnemen. k Heb geliek ook mor n abonnemìnt nomen, omreden dat k de joarege beter kennen leren wil. Mor dat haar k aiglieks al veul eerder doun most.

Van haarten felesiteerd, Krödde, en hopelk nog veule joaren!