Vaarde van De Vrais
Erwin de Vries wuir in de twijde helfte van de negenteger joaren n bekende artiest in Grunnen. As veurman van Deheleboel gaf hai vörm aan de Oost-Grunneger popmeziek. n Laandelke deurbroak leek der meschain in te zitten, mor de band is veurtied uut nander goan. De Vries ging wieder mit n carrière as solist en dij bleek bie ons nait minder suksesvol. En doarmit komt hai ook aal meer over de pervinziegrìnzen.
Hai het al drij staarke solo-albums op zien noam stoan en nou het e de vaarde uutbrocht. De nijste hait Leef t leven en wuir lesten zundag prezenteerd in theoater VanBeresteyn in Veendam.
Sunt t begun van t joar het hai mit zien muzikoale pazzipanten Christof Bauwens, André van der Werf, Harrie Groenewold en Bruno Brands aan de cd waarkt. Zai hebben mit nander weer n schiere ploade òfleverd, woar ook weer t typische De Vries-geluud in zit.
d’Inspiroatsie veur de teksten komt benoam uut t Grunnegerlaand, de Grunnegers en uut De Vries zien aigen leven. t Algemaaine themoa van Leef t Leven is dat je t leven koestern mouten. Dat kin je doun mit veul positivisme, mor t mag ook wel es mit n kritische kiek op ons wereld. Wie binnen t wènd van Erwin de Vries dat hai baaide schier in zien nummers verwoorden kin. En dat dut e onverminderd.
Specioale gaste was de noordelke blueskeunegin Gina de Boer. Erwin wol al n haile zet n duet mit heur opnemen. Noa zes joar aandringen was t den endelk zowied. Schuldgevuil was t rezeltoat, dat ze nou te heuren brochten. Toun zong Gina nog n wieder verblueste versie van Dizze Wereld van Erwin zien veurege album Dichter In Mie.
Bie zo’n albumprezentoatsie is t gebrukelk dat d’artiest lu bedaankt. Dat dut Erwin de Vries den ook: de bandleden, de producent, t theoaterperseneel, de lu woar e wies mit is en t aanwezege pebliek. Mor de daank mag net zo goud van ons kaande kommen, want wie binnen veur de vaarde moal verblied mit n echte De Vries. Om votdoadelk uut zien nije waark te citeren: ‘dankjoewel, meneer’. Terwiel dat ik noar de gesigneerde cd luuster, vroag k mie òf: woar zel k de gesigneerde poster es ophangen?
