Nissan teunt de nije Leaf

Nissan Leaf 2018 – foto: Nissan

De Nissan Leaf is wereldwied ain van de mainst suksesvolle elektrische auto’s. Sunt t medel in 2010 op de maarkt kwam, binnen der om en bie 280.000 eksemploaren van verkocht. Doarmit is Nissan n veurloper wat betoalboare, elektrische gezinswoagens aangaait. Dat willen ze vanzulf zo holden, dus is t tied veur de volgende generoatsie.

d’Eerste Leaf (Leading, Enviromently friendly Affordable Family car) haar nog n 24 kWh akkupakket en kon doarmit n òfstand van 160 km òfleggen. Vleden joar kwam n pakket van 30 kWh beschikboar, goud veur 250 km. Mit de nije Leaf is weer n nuvere stap veuruut moakt, volgens de NEDC-testcyclus is mit t 40 kWh-akkupakket 378 km hoalboar. t Volledeg oploaden van t akkupakket duurt 12 uur bie 3,3 kW of 6 uur bie 6,6 kW. Mit snelloaden binnen d’akku’s al in 40 menuten veur 80% vol.

Nissan komt mit nije technieken dij elektrisch rieden noar n hoger plan brengen. Doaronder t e-Pedal, woarmit rieden mit ain pedoal meugelk is. Dat is op zochzulf nait nij, bie veul elektrische auto’s kin dat al. Mit de regeneratieve systemen kin je al flink òfremmen deur bloots t gaspedoal lös te loaten. In veul gevalen huift den de rem nait intrapt worden, wat n bult slietoazie aan de remmerij scheelt. Boetendes wordt doarmit energie terugwonnen dij in d’akku’s opsloagen wordt. Volgens Nissan kin de Leaf deur zien e-Pedal haldaal tot stilstand kommen deur t pedoal lös te loaten, zulfs as de woagen op n hèllen staait. In 90 persìnt van de gevalen zol t e-Pedal mans genog wezen, ook in drok stadsverkeer. Toch zit der wel n gewoon rempedoal in en kin t systeem uutschoakeld worden.

ProPILOT is n systeem dat al leverboar is veur de Nissan Qashqai, dit komt ook in de Leaf. Dit systeem zörgt derveur dat de woagen zulf binnen de wegbelienen blift. Mit ProPILOT Park kin de Leaf haldaal zulfstandeg inparkeren.

Mit V2G (vehicle to grid) kin de Leaf stroom levern aan t lichtnet en doarmit ondersteunen geven bie piekmementen in t verbruuk. Nissan rekent dat aigenders van elektrische auto’s in de toukomst flink handeln goan in gruine stroom, meschain kinnen ze doarmit meugelke kopers over de strebe trekken. Ovregens kin via n app de loadstoatus van d’auto bekeken worden en kin t oploaden inpland worden om te profiteren van lege energietarieven.

De twijde generoatsie Leaf is ook weer n roeme en veulziedege viefdeurs hatchback. t Ontwaarp is nijmoods en sportiever as van zien veurganger. Mit de prominent aanwezege V-motion-grille paast e haldaal binnen de Nissan-femilie. De zwaarde achterste roamstielen volgen de automobiele trend van t ‘zwevende dak’.

De nije Leaf het n lengte van 4,49 meter en n bredte van 1,79 meter. De wielboases is mit 2,70 meter geliek aan dij van zien veurganger. De kovverruumte gruit noar n inhold van 435 liter. d’Omvang van t 40 kWh-akkupakket is zuver geliek aan t 30 kWh-pakket van de veurege Leaf. t Woagengewicht is mit 1.535 kilo wat hoger. Net as zien veurganger is de nije Leaf gain scheuriesder. d’Elektromotor levert mit 150 pk en 320 Nm meer vermogen en trekkracht, mor de topsnelhaid blift 144 km/u. Der komt ook nog n duurdere versie mit n staarkere motor en n groter akkupakket veur meer berek.

Mit ingang van oktober kin de nije Leaf bie de Nissan-dealer besteld worden. Aander joar jannewoarie worden d’eersten leverd. n Vanòfpries is nog nait geven, de verwachten is dat t in Nederland om en bie € 30.000,- worden gaait, geliek aan t uutlopende model.

Biewaarken 29-12-2017
De nije Leaf liekt nou al n verkoopsukses te worden. Sunt d’onthullen binnen 10.000 veurbestellens uut Europa binnenkommen, woarvan 1.500 uut de Benelux. De Nederlandse priezen binnen bekend. De nije Leaf komt in vaar uutvoerens:
Visia € 33.990,-
Acenta € 35.990,-
N-Connecta € 37.390,-
Tekna € 38.990,-
De particuliere koper krigt n wallbox of snelloadtegoud (bie Fastned) t.w.v. € 1.210,-. De priezen binnen inkl. BTW en BPM. Bestellen kin per direkt, de levern begunt in april.

Wèllen: Autoblog, DagelijksAuto, Nissan, Nu.nl