Poaske is de nije Kerst
Rond de Kerst aarger ik mie voak aan wat k ‘de terreur van kerstmeziek’ nuim. Ik kin nait begriepen dat zoveul artiesten t neudeg vinden om kerstnummers, of zulfs haile albums vol, op te nemen. Meer in t algemain snap k nait woarom Kerst zo’n overdreven gedounte wezen mout. En heurt Poaske nait n groter feest te wezen? Ik bin nait religieus, mor volgens mie is veur n christen de wederopstanden van Jezus belangrieker as zien geboorte.
Mor wat k mie zomor es òfvruig – t zel wel ingeven wezen deur de kerstmeziekterreur: binnen der ooit artiesten west dij poaskenummers opnomen hebben? Doarop kon k gain antwoord vinden, tot zowied mout mien konklusie dus wezen dat dat nog nooit doan is. Doarom heb k zulf mor n tekst schreven, op n bestoand nummer.
Op t originele Do They Know It’s Christmas Time van Band Aid was der nogal wat kritiek: muzikoal is t gain hoogstandje en ook op de tekst is veul aan te maarken. Bob Geldof en Midge Ure hebben dus gain topprestoatsie leverd. Dat leek mie n goud uutgangspunt om te pebaaiern wél n goie tekst te schrieven (nait dat ik main t beter te kinnen).
Op dit mement is de tekst nog wat te optimistisch over t vermindern van corona-moatregeln. Hail veul verbetern zit der nog nait in, mor wie maggen toch hopen dat der uutzicht is op meer …
Poaske is de nije Kerst
t Was n maal joar
t Gewone leven lag op zien gat
t Vuilde zo roar
t Was zo stil in Ommelaand en Stad
Zoveul lu waren ainzoam
En verloren ale moud
Mor as wie meer om nkander denken
Den komt t aal goud
Nou komt weer n tied
Dat we bie nkander binnen
Wie vuilden ons zo bepaarkt
Mor goan weer de vrijhaid vinden
De grode wereld ligt weer open
En wie kriegen weer goie zin
Zo as Jezus opston oet de dood
Komt de wereld weer in t ìnd
Ook op anderhaalve meter
Bin ik nait wied vot van die
Loat de òfstaand klaainer worden van die noar mie
En wie zitten mit nkander
Bie de poaskeboom
Dailen ons poaskestoet mit lu dij noast ons stoan
Zo kriegen wie de kop derveur
En geven ons bosschop deur
Poaske is de nije Kerst dit joar
Mit de Kerst konden wie nait bie nkander wezen
Mit de Poaske mout t den mor wezen
Poaske is de nije Kerst dit joar
Hest t al heurd?
Geef t deur
Hest t al heurd?
Poaske is de nije Kerst
Hest t al heurd?
Poaske is de nije Kerst
Geef t deur
Poaske is de nije Kerst [5x]
Noar: Do They Know It’s Christmas? – Band Aid
Orig. tekst: Bob Geldof
Meziek: Midge Ure
