Poëzie en powerrock

Dizze Stad, Noint? ft. Rients Faber – foto: Noint?

De Grunneger powerrockband Noint? (mit vroagtaiken) en Rients Faber, zanger van de band Krödde, binnen n biezundere soamenwaarken aangoan: ze hebben mit nander de single Dizze Stad opnomen. Noint?-drummer Paul Beijert en Rients binnen kennizzen en lopen nander noa n haile zet weer tegen t lief. Bie n borrel komt t idee om heur slim uutainlopende muzikoale achtergronden es bie nander te brengen, onder t motto: iets mit poëzie en powerrock.

De manlu van Noint? moaken al vieventwinteg joar soam meziek. De band bestaait, noast Paul Beijert uut gitarist Marius Heiner, bassist Wim Joosten en zanger/gitarist Wilfred van de Worp. Tot zowied het de band dik twinteg Engelstoalege nummers oetbrocht, vedaild over drij EP’s en n aantal lözze singles. Toch wordt t Grunnegs waarm onthoald.

Rients schrift n Grunneger tekst woarbie Marius meziek schrift; t begun van de single is n fait. Veur de bandleden van Noint? is t n uutdoagen om zachter en harmonieuzer te speulen as dat ze wènd binnen. Aan d’aander kaande mout Rients boven t geluud van de band uutkommen, zunder dat e schraauwen gaait. Noa wat wederziedse aanpazens en schoeverij aan volumeknoppen wordt t muzikoale snievlak vonden. Noa n poar oavends soam oefen ontstaait d’uutendelke single.

t Opnemen van de single mit Noint? is biezunder. De bandleden hebben de visie what you hear is what you get. Mit aander woorden: zo as je ons live speulen heuren, zo staait t ook op de ploade. Dat liekt zo simpel, mor is n enorme uutdoagen in de studio. t Mout aal strak wezen, magst gain noot missen en al haildaal gain vaalse noot klinken loaten. Wenneer de manlu heur instermìnten in de studio installeerd hebben en de drummer òftikt, heurst dat der al vieventwinteg joar mit nander speuld wordt. De meziek staait der, noa n poar rondjes waarmspeulen, prima op. Benoam veur Rients is t opnemen in ain keer n enorme uutdoagen: zien stem mout waarm wezen, hai mout in ain moal t juuste metrum pakken, alles zuver zingen en de tekst mout der goud in zitten. Mor ook Rients wait binnen twij keer de zang der op te zetten. ‘Dit mout t mor wezen’ vörmt unaniem t oordail van Noint?.

De tekst van Dizze Stad gaait over t gevangen zitten in t nachtleven van de stad. Vanzulf gaait t hierbie om t nachtleven van Stad Grunnen. Zuikend noar n uutweg in d’olle versleten binnenstad vol onhaail en duusternis. Dit leste is deur filmmoaker André Postma van Mediablik vongen in n pazende clip.

Wèllen: Rients Faber, Noint?

Dizze Stad

Ik loop deur noamloze stroaten
In n stad woar gainain mie ken
Gain plek woar ik vandoan kom
En ik goa naargens hin

Donkre wolken pakken soamen
spannen hangt hier in de lucht
Baang bekroep ik mien gewaiten
Kin ik sloagen, of op de vlucht

Refraain
Dizze stad, voel en versleten
Elke houk het zien verhoal
Achter roamen de gevuilens
En ik vuil ze allemoal

Hier pruif ik haarde woorden
Kin de pien hier goud verstoan
Allinneg en verloaten
Verstiefd blief ik hier stoan

Refraain

Instrumentoal

Brug
Dizze stad, het mie grepen en loat mie nait weer lös
Dizze stad, mit doezend deuren moar alles zit op slöt

Refraain