Popkonsert in Lederhose

The Heimatdamisch live in Bad Tölz – foto: YouTube / The Heimatdamisch

Is t herkenboar dat je infekteerd binnen deur de mezieksmoak van joen ollu, deurdat je in joen jeugd ‘gedwongen’ mitluusterd hebben? Mien ollu kieken veul noar amusementspergrammen op de Duutse tv, zo as t vrougere Musikantenstadl van d’Oostenriekse peblieke omroup ORF, dat ook bie de ARD te zain was. De Duutstoalege volksmeziek, schlagers en bloasmeziek kommen nog wel n moal in mien herinnerns noar boven, mor of k doar altied bliede mit bin? Gelukkeg is der n band dij zukse meziek beter verdroagboar moakt het. t Wordt al zowat n guilty pleasure

De Oberkrainer-coverband The Heimatdamisch is n gezelschop dij nije Top 40-hits, rockklassiekers en bekende popsongs uut de joaren 1980-1990 de Lederhose aantrekt. Bandlaaider, drummer, arrangeur en producer Florian Rein het n ploug topmuzikanten om zoch tou gadderd, dij mit veul muzikoaliteit en n beetje humor zain loaten dat populaire nummers goud akkedaaiern mit de van oorsprong Sloveense volksmeziek.

Muzikanten beleven mit de coronakrisis ook stoere tieden, omreden dat ze nait veur pebliek optreden kinnen. Gelukkeg is der YouTube. Lesten juni was The Heimatdamisch live via digitoale weg te zain. Zai speulden n thuuswedstried in n leeg Kurhaus in Bad Tölz, mit nummers van d’albums Highway To Oberkrain en Circus Oberkrain. t Optreden begunt mit n oberkrainerdeuntje woarvan nait votdoadelk dudelk is woar t noartou gaait, mor bliekt uut te draaien op So Lonely van The Police. t Nummer Funky Town van Lipps Inc is veul gaauwer herkenboar.

De mainste nummers worden allenneg muzikoal in n Lederhose of n Dirndl stoken, mor smangs is ook de tekst nog omtoald. Ain van dij nummers wordt hier ten uutvoer brocht: Happy van Pharrel Williams hait mit n Bayerische tekst Ja Des Gfreid Mi.

Al vroug in t optreden komt ain van d’högtepunten veurbie, mit Sweet Child o´Mine. De Guns ´n Roses-cover is de grootste hit veur The Heimatdamisch, mit n videoclip dij al meer as vaar miljoun moal op YouTube bekeken is. Hiernoa rocken ze nog even wieder mit n medley van Queen. De drummer vindt t neudeg om der tussendeur te kommen mit Rosamunde, woarnoa bliekt dat mit wat goie wille We Are The Champions op dezulfde wieze te zingen is. En voaker wordt der n stukkie van n volkstümlich laid of schlager tussen stopt, der komt bieveurbeeld aargens wat van Helene Fischer deur.

Veur Baby One More Time is t tied om n stem veur t voutlicht te hoalen dij t net zo sexy en verlaaidelk brengen kin as Britney Spears. Toch gaait de beurt aan zangeres Conny Kreitmeier veurbie, ten gunste van gastzanger(!) Chris Schuhbeck, dij derbie blift veur Take On Me van A-ha. Tegen t ìnde komt e nog n moal weer veur Sex On Fire, woarin ook alpenhoornbloazer Christian Loferer as gast mitspeult. Nóg n gastzanger, aankondegd as ‘absolute Rockgranate’ (smangs kinnen Duutsers t ook wel mooi zeggen), Alex Wesselsky, komt op batterij veur twij joaren ’80-nummers: Da Da Da en Sweet Dreams.

Nait elk nummer laint zoch derveur om in zien originele vörm te veroberkraineriseren. Van Nena heur 99 Luftballons blift bloots t refraain over, as n inhoaker dij t vervast goud dut aan lange biertoavels op n Oktoberfest.

t Leste nummer is Highway To Hell van AC/DC. Dat zol n goud nummer wezen om in feesttìnten en op festivals mit n goie Stimmung òf te sloeten. Dat komt der nait uut bie n YouTube-optreden veur n lege zoal. Mor toch het The Heimatdamisch zain loaten dat Oberkrainer vreugdevolle en krachtege meziek is, dij in kombinoatsie mit populaire nummers ook nog n braid pebliek aanspreken kin. Mien infektie zel nooit genezen, mor op dizze menaaier kin k der goud mit leven.

Bekiek hieronder t volledege YouTube-optreden van The Heimatdamisch in t Kurhaus in Bad Tölz van 14 juni 2020.

Eine deutsche Übersetzung dieses Blogs ist verfügbar. Laden Sie hier den Text herunter.