Wat Aans! geft goie hoop
De manlu van Wat Aans! leken van dij nijmoodse artiesten dij heur meziek bloots digitoal aanboden. Hail in t begun was der t album Aans Wat!, dij allenneg mor van heur webstee te downloaden was. In de tien joar doarnoa verschenen nije singles as videoclips op YouTube en loater wuiren ook dainsten as Spotify bruukt. Nou is mit Grunnegs Hoop toch n fysiek album uutbrocht, mor wel net even aans: t album komt nait op cd of vinyl, mor in n deusie van n kassettebaandje. Doar bliekt den weer n usb-stick in te zitten.
Zo as we t wend binnen van FiezeRik en De Beunhoas, zit in de mainste nummers de neudege humor, mor sommege nummers binnen wat serieuzer van toon. Veur t album aan was Roelfina al verschenen as eerste single. t Gaait over n verbroken reloatsie of n laifde dij nooit van twij kanten kommen is. Was zai n goldgroaver of haar hai n obsessieve laifde veur heur? Doar kin je n aigen invullen aan geven. t Is wel zo dat hai nou lege buutsen het. De daarde single Grunnegs Hoop is lesten september uutbrocht en kwam votdoadelk op de twijde plek binnen in de Noord 9. t Is n soamenwaarken mit Wia Buze, dij nait begunt as hiphopnummer. Wia ging vanzulf nait rappen, mor heur melodieuze inbreng kontrasteert en kombineert goud mit de fanatieke rap en de koorzang (n meersporege opnoame van de rappers zulf en heur producer Jeroen Russchen). Der zit n dudelke bosschop in: wie Grunnegers mouten wat grootser wezen op onszulf en huiven ons nait onder t mous stoppen loaten.
Doar tussenin verscheen, ook nog veur t album aan, Ik bin n G. Muzikoal liekt dit nummer op G-Funk, n stromen in d’Amerikoanse hiphop van de joaren 1990. Doarin staait de G veur gangster. Vanzulf binnen wie nait van dat criminele volk, dus is t bie ons de G van Grunneger: ‘gain eelske blèrbek, mor gewoon n nuchtere’. Dou mor gewoon. Schaande genog vinden veul westerlingen ons apaarten en bevestegen gounent dat beeld ook nog. In 2009 ruip weekblad Elsevier de gemainte Pekel uut tot de Slechtste Plek van Nederland. Doarnoa het de webstee GeenStijl n verslag moakt dat, bewust, niks verbeterd het aan t imago van Pekel. In t filmpie zit Adriaan Kleve Grunnegs te proaten tegen Rutger Castricum. Kleve zien Woaromdatten!? wuir bie Wat Aans! n gevleugelde uutsproak, woar ze nog es wat mit doun wollen. Zai hebben de gugel mit t onneuzele filmpie, deur op wat uutsproaken in te hoaken mit n tekst dij aiglieks naargens over gaait.
t Eerste woarmit Wat Aans! van zoch heuren luit, waren nummers as Haalf Stront, Haalf Regenwotter en Woisjawel! (Schunneg In t Grunnegs). In twaalf joar tied binnen ze muzikoal en tekstueel gruid, mor is der altied ruumte bleven veur dubbelzinnegheden en teksten over draank, poedies en seks. Dat Aine Moment zol over seks goan kinnen, mor wèl goud luustert, heurt dat t gaait over bier. Bokkie gaait wel over seks, n beetje mit n knipoog noar vrouger, toun ‘waren wie knienen, joa dat waren nog es tieden’.
In de mainste nummers binnen de manlu mit zien twijen te heuren, mor ze hebben ook solonummers. De Beunhoas zienent gaait over zien faveriete Grunneger snack, Metworst. Hier is t ook weer: dou mor gewoon, gain sjompagne of genoatenkroketten. Hai kin nait zunder metworst, mor t mout wel n vrizze worst wezen. In Repperdepep het FiezeRik kritiek op de Grunneger meziek: ‘ze binnen nait uniek, want de mainste Grunnegers moaken begroafenismeziek’. Zo slim is t ook nait, mor veul Grunneger meziek sprekt ons jonkvolk nait aan en ze vinden dat t aal op nander liekt. Mor wèl zörgt derveur dat de jeugd nog Grunnegs heurt? Dat is Wat Aans! En dat is gain grootsproak van de mit òfstand best bekeken en beluusterde Grunneger artiesten op YouTube: ze hebben sikkom 7000 abonnees en n aantal videoclips binnen al honderddoezenden moalen bekeken.
As je Grunnegs Hoop op Spotify beluustern, krieg je aacht nummers te heuren. De usb-stick bevat ook nog vaar singles dij in de drij joar doarveur op YouTube verschenen binnen: Trilploat, Sjomp, Batterij en Dik Doun. Van dij twaalf nummers binnen nait minder as zèzze n nummer 1-hit worden in de Noord 9 bie RTV Noord. Grunnegs Hoop mag dus n woar hitalbum nuimd worden.
Hoop dut leven, zeggen ze voak. Grunnegs Hoop is n album woar meziek op staait dij bie de Grunneger jeugd aankomt, mor nait per se n oldere generoatsie òfschrikt. De Grunneger toal is nog aal leventeg en dat mout je laankdureg zo holden willen. Doarveur mout je t jonkvolk dermit in aanroaken brengen en holden. En wat is nou n betere menaaier as mit meziek? Mit de meziek dij Wat Aans! moakt, is der goie hoop dat t mit de toukomst van t Grunnegs nog wel n haile zet goud zit.
