Stinkerij

n Adl-assistente van Fokus zee n moal dat der smangs zo’n apaarde roek bie mien veurdeure hong. k Haar t inderdoad ook wel es roken, mor kon nait thuusbrengen wat t was. Zo’n schaarbe neuze heb ik nait, wie hebben t mor holden op stinkerij van de Domino’s Pizza woar k liek boven woon. Gek genog rook ik niks op t balkon.

Lestdoags wuir bie mie aanbeld. Ik lag nog op bèrre, mor mien hulp was der al, dij dee de deure lös. Der waren twij plietsies, dij vruigen of ik beld haar dat der bie mien noabers al n zet gain leventeghaid was. Mor ik moak mie gain zörge om n huus woar al n joar (of was t aanderhaalf?) gain leventeghaid te zain of heuren west is. Sunt dat zai mit heur drij jackrussellterriërs deruut zet is, is t der al moessiestil. Ooit heb k nog es van n bezörger n waskemand aannomen veur n noaber dij nooit kommen is.

Dij plietsies bie deure wollen zain woar of mien balkon zit en of ze doar langs konden om hiernoast te kieken. Dat kin nait, aans haar k vervast wel waiten of der wat loos was. Zie hebben zoch wel tougang moakt, want loater was der wel leventeghaid. Der zat n wietkwekerij, dij hebben ze vothoald.

Meschain is t wel n interessante vroage veur adl-assistenten: hou zol je dermit omgoan as n cliënt mit zuksoort dingen aan d’loop was? t Idee van Fokus is dat cliënten heur leven zulf inrichten en dat Fokus zoch doar nait mit bemuit. k Heb dervan heurd dat aargens (nait hier, bie n prejekt op n aander stee in t laand) n moal n Fokus-cliënt aanholden en vastzet is veur t hebben van n wietkwekerij. Dij zel den ook tot zien huus uutzet wezen, zo as t heurt. Dat is meschain wel t toppunt van integroatsie. Net as bie dit bericht op Beijumnieuws.