Vissering en vogeltjes

Vogeltjeman en Vogelwies, Alex Vissering – foto: Bert Wijnholds

De laifhebber van Grunneger meziek wait vervast dat zanger en laidjesmoaker Alex Vissering ook n fervent hobby-vogeloar is. Dizze baaide laifhebberijen kommen bie nander in n dubbel kunstprejekt, dat bestaait uut de cd Vogeltjeman en t bouk Vogelwies. Vissering en illustratrice Ellen Tierie waren al joaren van plan n bouk te moaken en kregen tiedens de coronapandemie endelk n goie aanlaaiden om der waark van te moaken.

In 2020 gaf Vissering zulf n eerste aanzet tot t onstoan van t bouk, deur n poar moand laank elke dag n vogelsoort op zien socioale medioa te zetten, mit n körde omschrieven en n filmpie derbie. Doar kreeg e veul positieve reaksies op, woarop Babette Alma van RTV Noord hom vruig of e doar nait n doagelkse radiorebriek van moaken wol. Dat item wuir Vogelwies nuimd en brocht weer veul reaksies aan, voak mit de vroage: is doar ook n boukje van?

In veul teksten van Vissering kommen Grunneger vogelnoamen veur, dij vörmen de rooie droad deur t bouk. Der stoan om en bie 50 vogels in, elk beschreven in t Nederlands en (vertoald deur Sies Woltjer) in t Grunnegs mit waitjes en anekdotes. Doar tussendeur stoan de laidteksten, mit verwiezens noar de cd’s woar dij op stoan en QR-codes veur de Spotify-app. Deur dij in te scannen, kin je noar de nummers luustern. n Aantal teksten binnen nog nooit op meziek zet. Noast de ploatjes van Tierie stoan der foto’s in van André Dümmer, Ina Telkamp en Vissering zulf. Vogelwies is gain ornithologisch verantwoorde gids, mor wel n schier startpunt veur de begunnende vogelkieker.

Op de cd Vogeltjeman stoan vanzulf weer n poar nummers mit vogelnoamen derin. Ik Loop, dat vleden joar as eerste single verscheen, gaait over Vissering zien nije hobby: as noatuur- en vogellaifhebber is e voak boetendeure en veul aan t wandeln. In dit vroleke laidje wordt n muzikoale heufdrol vervuld deur bandoneonspeuler Carel Kraayenhof. Wandeln is n goie menaaier om tot rust te kommen en de boudel te reloativeren. Dat kin naargens beter as in Nij Stoatenziel, wat Vissering aangaait t schierste stee van t heelal. Meziek Op Diek is n eerbetoon aan dat stee. Mit drij hoornpertijen in t arrangement dut dit laid denken aan Keuper En Gold, n eerder prejekt van Vissering, mit de Provinciale Brassband Groningen.

Vissering is penziouneerd van, zo as dat hait, zien moatschoppelke loopboan. Kom je doardeur aans in t leven te stoan, wat t reloativeren en tot rust kommen makkelker moakt? Mit d’olderdom krieg je voak meer wieshaid en kin je beter òfstand nemen van de (kolle) drokte in dizze wereld. Dat kin ook gewoon op joen aigen haim, bliekt uut As Ik Thoes Kom. Bepoalde (levens)wiesheden het Vissering opdoan van aander pensionado’s, zo as zien muzikoale held Willie Nelson. Doarvan het e twij teksten in t Grunnegs omtoald: t Wordt Makkelker (It Gets Easier), wat gaait over beter nee zeggen kinnen as je older worden, en n poletieke bosschop in Stem Ze Vot (Vote ‘Em Out). In Mien Geluk Is Op wordt t verhoal verteld van n man dij ‘op t ende van de doemstok’ zit. Konst veul van hom leren, mor ‘most t nou zulf doun’. Kinder hebben heur aigen wiesheden doar gaait de nije single Opa Waist over. In de tekst binnen uutsproaken van Vissering zien klaainkinder verwaarkt.

Mor wèl op penzioun is en zoch nait meer drok moaken huift, is nait altied vrij van aargernis. Wat veur Vissering n verschrikken is, binnen artiesten dij n aander noadoun mouten. In Aan Dooien Wordt Veul Verdaind geft e as wieze road om bie diezulf te blieven en dat altied vast te holden. De Balloade Van De Bladbloazer gaait over n man woarover aiglieks niks over te vertellen vaalt, behaalve dat e in d’haarfst pas opleeft as e zien bladbloazer aanslingern kin. Vissering vragt zoch òf of je den wel goud bie de kop binnen. As t aan hom ligt: ‘bloas de bladbloazer op’. t Nummer As Ik De Blues Heb brengt hai al n joar of wat te heuren bie live-optredens van De Troebadoers. Doar liekt t muzikoal wat steveger, bluesier, van oard as in dizze ploatopnoame. In de regel ‘as k in de blues bin, vuil k mie röt’ zingt e den n leste woord dat explicieter is.

Dit dubbelprejekt van bouk en cd is Alex Vissering ten vouten uut: zien passies, zien kiek op t leven en zien menaaier van de dingen reloativeren kommen hierin bie nander. Doarbie verriekt hai ook nog ons kennis van vogels en van de Grunneger toal. t Is dus ook leerzoam veur de toaveloakster. En dat is gain vogel, mor n nijsgiereg iemand.

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *