De Porsche van Janis
Vandoage zol Janis Joplin 80 joar worden wezen. De legendoarische rock- en blueszangeres kwam uut tied toun ze nog mor 27 was. Op zundagoavend 4 oktober 1970 wuir ze levenloos vonden in heur koamer in t Landmark Motor Hotel in Hollywood, woar ze al n poar moanden logeerde. n Overdosis heroïne zol heur fatoal worden wezen.
Drij doage eerder was ze veur t lest in de studio west, om opnoames te doun veur heur album Pearl. Ain van de nummers doarop, t leste dat ze schreven het, is Mercedes Benz. Zai druig t op aan John Lennon, van wèl ze groot fan was.
‘My friends all drive Porsches’, zong ze, mor zo’n woagen haar ze zulf ook. In 1968 het ze twijdehands n Porsche 365C cabriolet van 1964 kocht. Dij was van origine gries, mor Janis luit hom deur roadie Dave Richards beschildern. Richards begunde mit Candy Apple Red as grondloage en dekoreerde de woagen mit o.m. de gezichten van Janis en heur bandleden, steeën woar ze west binnen, t ‘Oog van God’, Janis heur steernbeeld Stainbok en aander òfbeeldens. Nait t klaainste stukkie ploatwaark wuir oversloagen. Om t kunstwaark, deur Richards betiteld as The History of the Universe, te beschaarmen, wuir n loage blaanke lak aanbrocht.
Janis bruukde heur Porsche om doagelks in te rieden. Mit zien opvalende beschildern was t ain van de mainst herkenboare woagens in d´omgeven van San Francisco. Hai was onlòsmoakelk verbonden mit Janis. As ze hom aargens perkeerd stoan haar, kreeg ze van fans voak braifies onder de roetenwizzers om heur te bedanken veur heur meziek.
d’Òfwaarken mit blaanke lak was n verstandege beslizzen, zo bleek bie daifstal van de woagen. De daif realiseerde zoch dat e de bekendste auto in de wiede omgeven stolen haar en muik n begun hom gries te spoiten. Veurdat e dat kloar kriegen kon, wuir de woagen vonden en bie Janis weerombrocht. Dave Richards kon de lak der weer òfhoalen zunder zien aigen waark aal te veul te beschoadegen.
Tot aan heur dood het Janis de Porsche in bezit had, hai ston veur t hotel op d’oavend dat ze vonden is. Doarnoa kreeg heur manager Albert Grossman de woagen in handen, dij nam hom mit noar New York State om zulf in te rieden, mor ook om aan femilie en vrunden uut te lainen. Toun de femilie Joplin drij joar loater de Porsche weer in bezit kreeg, bleek dij in slechte stoat te wezen. Noa wat reperoatsies was e technisch weer geschikt om de weg op te goan. De lak was wel zo slecht worden, dat t bladdern ging en onder t rieden in grode stukken deròf vloog. Om t koetswaark te beschaarmen, wuir besloten om de woagen weer over te spoiten. Mit vernijs n grieze kleur het e n beste zet bie de Joplins in gebruuk west: òfwizzelnd haar Janis heur bruier Michael hom in Arizona en heur zuster Laura in Denver, tot t te veul geld en waark kosten ging om hom te onderholden. In 1985 het Michael hom onder n zaail wegzet.
Begun joaren 1990 wuir dudelk wat t belang was van de Porsche as symbool van zien aigender en heur tied. Kunstenoars Jana Mitchell en Amber Owen van de Denver Center Theater Company. wuir vroagd om de beschildern van Richards te reproduceren. Laura Joplin was in tied begund mit t schrieven van n biogroafie over Janis. Op dit bouk, Love, Janis, was ook n musical inspireerd. Bie de premiére hiervan in Denver was de woagen veur t eerst weer in zien herstelde glorie te zain. Vanòf 1995 was e, mit körde onderbrekens, twinteg joar te zain in de Rock and Roll Hall of Fame and Museum in Cleveland, Ohio.
In 2015 besloot de femilie Joplin de woagen te vaailen, om in noam van Janis geld veur laifdoadeghaid in te zoameln. Op 10 dezember van dat joar is e deur RM Sotheby’s aanboden op n vaailen in New York City aanboden. De schattens waren dat d’opbrengst aargens tussen $400,000 en $600,000 uutkommen zol. Dij verwachten wuir roem overtrovven: t hoogste bod was nait minder as $1.76 miljoun, woarmit t mit òfstand de duurste Porsche 356 was dij ooit op n peblieke verkopen van d’haand goan is. Sotheby’s moakt noamen van kopers nait bekend en de nije aigender het zochzulf ook nait bekendmoakt. Loater ging t verhoal dat de mysterieuze koper n vraauw wezen zol, dij de woagen veur zochzulf kocht het as kedo veur heur 60e verjoardag. Zai zol wonen in Gull Lake, Michigan. Dat is hail goud meugelk, want in oktober 2016 en maai 2017 het de Porsche twij moal dail uutmoakt van tentoonstellens in t Gilmore Car Museum in Hickory Corners, Michigan, zo’n tien menuten rieden van Gull Lake. Doarnoa is e meugelk nait meer te bezichtegen west. As doagelks vervoer zel e wel nait meer bruukt worden. Begriepelk, as je bedenken hou zo’n godsvermogen dat e nou weerd is. Mor ook zunde, want derin rieden zol n beter eerbetoon aan Janis wezen. Want zai dee t ook, ja …
Bekiek hier meer foto’s van Janis Joplin heur Porsche.
Wèllen: RM Sotheby’s, WBCK, Janis Joplin | YouTube, Rock & Roll Hall of Fame | YouTube
