Twij deuntjes veur Henk

Gewoonlek vin ik Knoal net even te wied van Stad òf om n oavend noar t theoater te goan. Mor in dit geval mos n uutzundern moakt worden: n eerbetoon aan Henk Scholte, d’ons veul te vroug ontvalen ‘godfather van de streekkultuur’. Elkenaine dij wat dut in de Grunneger toal, kultuur en meziek mos doar toch wel bie wezen, dus k heb ook de raaize noar Geert Teis moakt.

Op 22 feberwoarie is Henk Scholte uut tied kommen, hai mog mor 65 joar worden. Mit t overlieden van de zanger, prezentoator en radiomoaker is n vat vol kennis over de Grunneger toal, meziek en kultuur verloren goan. En hai haar nait bloots de kennis, mor ook n nooit òfloatende inzet om dij mit aandern te dailen.

Veur de Grunneger meziek het ‘Henkie Törf’ slim veul betaikend. In de leutje vieventwinteg joar dat hai bie Radio Noord t pergram Twij Deuntjes Veur Ain Cent prezenteerde, het e verschaaiden opkommende talenten n podium geven en, woar neudeg, artiesten aanpeerdjed om deur te goan. En as veurman van folkband Törf was hai zulf ook mit de meziek bie t pad. Dat der op t heden zoveul goie Grunnegstoalege meziek moakt wordt, is veur n groot dail Henk zien verdainste.

Alle reden veur Bert Hadders en Rolf Schreuder om n theoaterveurstellen te organizeren om t leven en t waark van de ‘Grunnegste Grunneger’ te gedenken en te vieren. In Twij Deuntjes Veur Henk brocht n riege toal-aktieve Grunnegers n eerbetoon aan de markante Knoalster. Vanzulf mos dat den wezen in t theoater dat noar dij aander markante Knoalster vernuimd is, Geert Teis. Elkenaine dij vroagd wuir, het doadelk touzegd mit te waarken: De Troebadoers, Jan Veldman, Marlene Bakker, StAD, Wat Aans!, Irene Wilkens & Suze, Wia Buze & Chris Kleine, Erwin de Vries en VanDeStraat. Henk zien Oost-Vraize vrund Otto Groote was der ook bie mit zien ensemble. Elk zong Twij Deuntjes, mor dat sprekt ja veur zochzulf. As nait-muzikoale biedroagen druig Fieke Gosselaar twij gedichten veur (aine van heurzulf en aine dij Henk n moal mit heur daild haar), las DvhN-columnist Herman Sandman zien dreugkomisch verhoal veur over Henk en Bob Dylan in Noordpolderziel en las theoatermoaker Theo de Groot n braif veur aan overbuurman Henk, woarin hai Henk typeert as lekkerbek en levensgenieter. As slötakkoord zongen VanDeStraat en Jan Veldman n Grunneger omtoalen van ain van Henk zien favoriete nummers: t deur de Vloamse laidjesmoaker Lieven Tavernier schreven De Fanfare Van Honger & Dorst.

Elkenaine dij wat dut in de Grunneger toal het zien of heur aigen herinnerns aan Henk. Mor uut aal de verhoalen over hom komt noar veuren hou hai zien kennis en enthousiasme overbrocht. Wie hebben n laid mit de titel t Grönneger Ras. n Regel doarin is: ‘stil en stug van oard, en wat kört van woord’. As der ain Grunneger is woar dit nait over gaait, is t Henk Scholte. Elk dij geregeld kontakt mit hom haar, zegt t: as Henk mit joe aan de proat ging, mos je der wat tied veur uuttrekken, want hai haar zien proat nait morzo uut. n Aander regel zegt: ‘mor zien leven laang veur t waark nait baang!’. k Zol gainent waiten dij zoch zo mit haart en zail veur ons toal en kultuur inzet het as Henk, dat zel nog mist worden.

Kin we t in de Grunneger toalwereld redden zunder Henk Scholte? Vervast, as elkenaine in zien noam n stap ekstroa zet om de boudel te blieven aanjoagen. Mit de gedachte aan n Henk Scholte, dij mit zien krachtege stem, vol enthousiasme en ook tröts, t nijste nijlootje in ons riekdom aan Grunneger meziek mag aankondegen.

k Zeg: tjeu Henk, mor nait om òfschaaid te nemen. Doe zelst ja altied bie ons wezen, zo as wie altied bie die wezen zellen. Geern kom k elk joar in dien herinnern weer op Knoal veur n nije Twij Deuntjes Veur Henk!

Bekiek t verslag van Twij Deuntjes Veur Henk in Noord Vandaag van 3 april 2025, vanòf 18:12.

Beluuster òflevern 265 van Twij Deuntjes Veur Ain Cent mit doarin o.m. De Fanfare Van Honger & Dörst deur VanDeStraat & Jan Veldman.