Is dit nou loater?
n Grunneger laidtekst op Is Dit Nu Later? van Stef Bos. Wie hebben t in ons kindertied aalmoal voak genog heurd: ‘loater, ast groot bist.’ Net of je den wel waiten zellen hou t leven in mekoar zit. Mor ook as je groot binnen vaalt dat nait altied tou. In Stef zien tekst wait de verteller noa aal dij tied nog nait wèl hai is. t Nummer is òfkomsteg van Stef Bos zien album Is Dit Nu Later uut 1990.
As gewezen tekstredakteur hol ik bie n riegje van waarkwoorden vast aan de ‘gruine’ woordvolgörde: t hulpwaarkwoord komt achteraan te stoan. Dat haar k in mien waark veur Kreuze wel diskuzzies over mit schrievers dij mie star of olderwets vonden in mien toalgebruuk. Dat mag, ik vin t grammoatikoal ‘mooier’ Grunnegs. Om ‘rooie’ vörms te veurkommen, mos k de regels ‘want de meester had verteld’ en ‘en ik zou die hele chaos nu toch helder moeten zien’ veraandern, doar heb k ‘want meester haar ons ja verteld’ en ‘en dij haile toezeboudel mos ik nou toch helder zain’ van moakt.
Zo is dus t Grunnegse woord toezeboudel in mien tekst beland. Ik bin der op zochzulf gain veurstander van om typisch Grunneger woorden in joen tekst te stoppen, allenneg mor om zo wied meugelk van t Nederlands òf te wieken, doar mag je wel terugholdend in wezen. k Zol nooit t dikke woordenbouk van K. Ter Laan dernoast leggen om es even n échte Grunneger tekst te schrieven. Woar t woord beziedjen bie mie den votkomt? t Zel wel n ‘aarvenis’ wezen van mien waark as tekstredakteur. t Bliekt dat ik wel voaker woorden schrief dij k as geboren Veenkelonioal nait zeg. k Leuf dat beziedjen Hogelandsters is, ik zol ‘gewoon’ verstoppertje zeggen. Mor k heb beziedjen vrij gedachteloos opschreven en nait bewust uut t woordenbouk opdoken. t Vuilt veur mie nait as onneudege mooischrieverij, dus k loat t mor zo.
Is Dit Nou Loater?
Wie speulden ooit beziedjen
In de pauze op t plaain
Wie haren grode dreumen
Want wie waren toun nog klaain
d’Aine wuir n voetbaler
d’Aander wuir n held
Wie leufden in de toukomst
Want meester haar ons ja verteld
Je kinnen loater ales worden
Astoe mor dien huuswaark kenst
Mor doe most geduldeg wachten
Totdast loater groter bist
Is dit nou loater
Is dit nou loater astoe groot bist
n Diploma vol mit leugens
Woarop staait dastoe volwazzen bist
Is dit nou loater
Is dit nou loater astoe groot bist
Ik snap gain donder van t leven
Ik wait nog aal nait wèl ik bin
Is dit nou loater
Wie speulen nog beziedjen
Mor nait meer op t plaain
En wat de mainsten worden binnen
Haren ze nait zo veur zoch zain
Wie binnen aalmoal volwazzen
Wèl nait weg is, dij is zain
En dij haile toezeboudel
Mos ik nou toch helder zain
Mor ik zai gain haand veur ogen
En t duuster moakt mie baang
Mamme, mamme
Kin t licht aan op de gaang
Is dit nou loater
Is dit nou loater astoe groot bist
n Diploma vol mit leugens
Woarop staait dastoe de woarhaid kenst
Is dit nou loater
Is dit nou loater astoe groot bist
Ik snap gain donder van t leven
Ik wait nog aal nait wèl ik bin
Is dit nou loater
Is dit nou loater
Ik snap gain donder van t leven
Ik wait nog aal nait wèl ik bin
Is dit nou loater
Is dit nou loater
Is dit nou loater
Noar: Is Dit Nu Later?
Orig. tekst en meziek: Stef Bos
