Old en Nij ’24-’25
Aiglieks is t nait mien gewoonte om rond n joarwizzeln weerom te kieken. k Beleef deurgoans gain dingen dij zo biezunder binnen, dat k doar aan t ende van t joar nog even bie stilstoan mout. Dat wil nait zeggen dat k n saai leven heb, zeker nait. Mor t leven kin ook mooi wezen zunder dat der haile spannende dingen gebeuren.
Wat zeker vermeldensweerd is, is mien biedroage aan de Grunneger meziek, dat ik d’aanzet geven heb tot t ontstoan van t nummer Lammerburen van Driefzand & Irene Wilkens. De mannen van Driefzand binnen aan d’hoal goan mit mien laidtekst Boven Pekel, dij al bie Irene Wilkens lag. Uutendelk is nog t ain en t aander aan mien versie verspiekerd en is t dus nait meer haldaal ‘mien’ nummer, mor zunder mien idee was Lammerburen meschain nooit ontstoan. k Wil nog wel even weer vermelden, dat Henk Scholte n moal in t radiopergram Twij Deuntjes Veur Ain Cent zee, dat Frankfurt Oder zoch lainde veur n Grunneger omtoalen. k Haar toun al n onòfgemoakte tekst liggen, woar k mor es waark van moaken mos. Dat is deur Driefzand oppikt en het n oardege hit aanbrocht: sunt 24 maai is de videoclip dik 9.300 moal bekeken en in de Grunneger 1000 kwam Lammerburen binnen op nummer 311. Nog nait zo hoog as de Nederlandstoalege tegenhanger Zoutelande op nummer 198, mor toch n noteren om groots op te wezen.
Bepoald nait positief is de toustand bie Fokus. t Haile verhoal is te veul om hier te vertellen, mor t komt hier in t kört op dele: deur fouten van de manager binnen grode perblemen mit onderbezetten en hoge waarkdruk ontstoan. In de leste twij joar binnen der meerdere cliënten bie kommen, zunder dat t team berekend was op d’ekstroa zörgvroag. t Personeelsverloop is al joaren schrikboarend hoog en t wil mor nait lukken om genog, en goud geschoold, personeel in te zetten om elkenaine van pazende assistentie te veurzain. Je konden derop wachten dat dat n moal misgoan zol. Nou kin Fokus nait goud meer aan heur zörgplicht voldoun. De manager kin dat allenneg mor ‘oplözzen’ deur d’aigen regie van de cliënten (t idee achter Fokus) te bepaarken of deur de cliënt mit de grootste assistentievroag deruut te waarken. En dat bin ik. Mor Fokus geft heur nait de middeln om mie de zörg op te zeggen, ze kin bloots inzetten op gevuilens van onzekerhaid, onvaaileghaid en angst, en den hopen dat ik bezwiek of dat t team zoch tegen mie keert. Dat is nog nait gebeurd en gaait ook nait gebeuren. t Team wil alles deraan doun dat k hier nog blieven kin. Ondanks dat is mien vertraauwen in Fokus flink òfnomen. En aiglieks ston k al n zetje in twievel of Fokus nog wel pazend veur mie is. Want slot t nog echt aan bie wat k wil en neudeg bin?
Goie veurnemens dou k gewoonlek nooit aan. As je dingen aans of beter doun willen, mout je doar nait mit wachten tot t begun van n nij joar, mor der geliek waark van moaken. k Wil dit den ook nait per se n goud veurnemen nuimen, al vaalt t zo’n beetje geliek mit de joarwizzeln: k bin t aan miezulf verplicht om te kieken of t hoalboar is om bie Fokus vot te goan. Mor doar wil k dizze blog nait mit òfsloeten. Om nog weerom te kommen op t biedroagen aan de Grunneger meziek: dij poar Grunneger teksten dij k op bestoande nummers schreven heb, hebben mie mainst positieve reaksies aanbrocht. Dat is wat om mit aan d’loop te blieven, al is t veur mien aigen oardeghaid. As n artiest der belang bie het, is dat veuraal n mooie biekomsteghaid. Hopelk kin k uutendelk ook hail wat nijs opbedenken. Mien eerste pebaaiersels veur aigen teksten stellen nog nait hail veul veur, mor wèl wait wat der nog komt. Mien veurnemen as blogger is altied al om minstens ain moal in de moand wat te schrieven, k leuf dat dat nog mor ain joar lukt is. Aan t begun van 2025 heb k dus al wel wat uutdoagens liggen.
