Klein vanBeresteyn – Erwin de Vries
Van hou stoefbie kin je theoater beleven? Onder de nuimer Klein vanBeresteyn worden bie t theoater in Veendam enkele biezundere veurstellens geven, dij joe t ervoaren loaten. De noam geft al aan dat t gaait om veurstellens veur klaain pebliek, der kinnen maximoal 50 personen bie wezen. Dij zitten op t podium, stoefbie d’artiest.
Lesten vrijdag gaf Erwin de Vries zo’n klaainschoalege veurstellen. Hai speulde solo en veuraal minder bekend waark. In de meer as datteg joar dat De Vries in de Grunneger meziek zit, het hai n groot oeuvre opbaauwd, dij veul hits omvat, mor ook talloze nummers dij bie de Grunneger mezieklaifhebber nait zo bekend binnen. Veul van dat waark is aargens te vinden op de riege albums dij hai, solo en as veurman van Deheleboel, uutbrocht het, mor wordt bie optredens nooit (meer) speuld. Mooi om doar weer es wat van te heuren.
Noast dit klaaine feessie van herkennen, zaten der, zulfs veur d’echte Erwin De Vries-fans, nijegheden en verrazzens bie. Echt onbekend waark, mit olle nummers dij nooit op n album kommen binnen, mor ook n nummer dij we nait eerder van hom in t Grunnegs heurd hebben. Mit Deheleboel en ook solo het hai enkele Nederlandstoalege nummers opnomen, mor dij brocht e nait meer te heuren, omreden dat t pebliek hom nait verston. Nou zol dat wel touvalen wezen, mor ik vin wel dat e in dij nummers minder goud n gevuil overbrengt as in t Grunnegs. Veur de gelegenhaid haar e t Deheleboel-nummer Rust van n Grunneger tekst veurzain. As je t mie vroagen, is t doar n beter nummer van worden.
Mit Zummer brocht hai n noagelnij, nog nait verschenen, nummer te heuren. Meugelk komt dij op zien volgende album en/of wordt e as single uutbrocht. Gaait dat n nije (zummer)hit veur hom worden? Wat om noar uut te kieken veur de fan. Net as n nog te verschienen bouk mit teksten dij nooit in n nummer verwaarkt binnen. Dij zol vleden joar al uutbrocht wezen, mor dat is hom toun nait worden. Erwin wos ons te verzekern dat dat nog aal op stoapel staait.
As d’artiest aan zien touheurders vragt welk nummer ze nog geern heuren willen, is der n grode kaans dat dat gain onbekend waark wordt. Zo gebeurt t den ook dat toch nog n populair nummer inzet wordt. Deurdat je mit zo’n klaain pebliek binnen, wordt den wel verwacht dat elkenaine de schroom van zoch òfgooit om keihaard mit Miss Scheemda mit te zingen.
[wordt vervolgd]
