Tammo Zingt Folk

TikTok Tammo gaait weer de theoaters in, mit zien nije veurstellen Tammo Zingt Folk. Vleden weke waren de try-outs doarvan bie VanBeresteyn in Veendam. Tiedens de veurstellen gaait Tammo aan de raaize noar Ierland, woar zoch weer n hilarisch verhoal òfspeult, zo as allenneg Tammo t beleven kin.

Tammo het n aarvenis van zien opa kregen: n kovver vol mit kraslötten. Der zit wel n veurwoarde aan: hai mout d’opbrengst van dij lötten dailen mit zien bruier. Zien bruier? Mor dij het Tammo ja nait! Toch wel dus … n twijlingbruier nog wel, Popko, dij as aarme folkzanger deur zien laand trekt om in elke pub op te treden. Dat is ja mooi, n (meschain wel dikke) aarvenis en n femilielid derbie om t kaptoal mit te verdailen, beter kin t toch nait? Tied om de rooie Ford Escort (as dij veur n zaacht prieske moakt is) in de boane te brengen en noar Ierland òf te raaizen. Onderwegens òf en tou n lötje openkrazzen, mor nait aine woar n pries op vaalt. Och, wat kin dat geld ook schelen, femilie is ja veul belangrieker. En Tammo gaait zien bruier vinden. Mor woarzo? Ierland is veul groter as Grunnen, dat gaait nog n haile zuiktocht worden. Popko liekt zo stoefbie en is toch zo wied vot. Mor gelukkeg kommen ze bie mekoar. Dat t leste löt, deur Popko openkrast, ook niks opleverd het (toch?), dut niks òf aan Tammo’s geluk. Want n bruier dij alles mit joe dailt, is toch veul meer weerd?

[wordt vervolgd]