Mooier Wark
Boerenrock is gain meziek woar k voak noar luuster. k Zol ook zeker nooit noar n feesttìnde goan om n optreden van n boerenrockband te zain. Dat betaikent nait dat k der n hekel aan heb: op zien tied is der niks mis mit nummers dij goan over feesten, zoepen, poedie’s en seks. t Huift ja nait altied inhold en daipgang te hebben. Mor k mag der wel over as boerenrockers heuren loaten dat ze meer kinnen, deur ook mit serieuzere nummers te kommen of de feesttìnde n moal veur t theoater in te ruilen.
De manlu van Mooi Wark kinnen dat. De Drìntse siepelrockers binnen vleden joar al de theoaters langs west en bliekboar was dat zo’n sukses dat ze der geliek mor n nije show aan vastplakt hebben. Doarmit stonden ze lesten dunderdag in theoater VanBeresteyn in Veendam, dat wol k wel n moal zain. In Mooi Wark Giet De Boer Op speulen ze nummers dij je nait in feesttìnten heuren. Mit twij gastmuzikanten op pedal steel guitar en piano krigt de meziek n wat aander geluud as dat we gewoonlek heuren, aargens tussen boerenrock en country in.
Bie Mooi Wark in t theoater kom je veuraal om de nummers te heuren woarin ze zoch van n serieuzere kaande zain loaten, zo as Warkende Helden (noar Working Class Hero van John Lennon), heur lofzang op de boeren en aarbaiders dij ‘veur een paor centen en vreetn op zien bord‘ t laand draaiende holden; t laid Prachtig. dat gitarist Arnold Kuik veur zien vraauw schreef op Perfect van Ed Sheeran en de band speulde op zien traauwdag of Drink Een Bier Met Pa, noamens aal volwazzen mannen n eerbetoon aan de voaders dij heur mit wieshaid en woar neudeg mit haarde haand grootbrocht hebben. Doodse Stilte (n bewaarken van The Sound Of Silence van Simon & Garfunkel) is de nummer 1 in de Drentse 1000 en dus de tegenhanger van d’aiwege nummer 1 in ons Grunneger 1000. Biezunder is, dat de nummers zo’n beetje dezulfde bosschop uutdroagen. Mor den vin ik, sorry Ede-fans, de Drìntse tophit toch de mooiste. Mooi Wark gaf heur aigen draai aan Ede zien nummer, deur der ‘ik bin nog nooit zo dronken west‘ van te moaken, wat ik wel woarderen kon, mit mien hoat-laifdeverholden dij ik heb mit Ede Staal. t Mainst serieuze mement in de veurstellen kwam mit Zie Ik Joe Ooit Nog Iens Weer, dat zanger Bert Koops en tounmoalege drummer John Roffel ooit schreven ter ere van John zien overleden voader. Toun in 2017 John zulf uut tied kwam, kreeg t nummer n ekstroa emotionele loaden veur d’aandere bandleden. Veur de veurstèllen kregen de manlu van n fan n zulfgemoakt petret van de nimmer vergeten drummer, dat ze groots aan t pebliek zain luiten. Zo was John der toch even weer bie.
Noast heur meer daipgoande nummers kwam vanzulf n riege van de ‘vieze laidjes’ veurbie woaraan ze t grootste dail van heur sukses te danken hebben. Want ook in t theoater is n oavendje Mooi Wark nait kompleet zunder siepelrock-klassiekers as Idioot, In De Blote Kont, Bok ‘M D’r Op en Ik Ben En Blief Een Boer. Mit dus n wat aander geluud: minder elektrische gitaren en de verstaarker nait vol open. Zo heur je dat ze echt goud speulen en zingen kinnen, en rockt t net zo goud. Tussendeur lepelt bassist William Bossong vermoakelke anekdotes op uut t 32-joareg bestoan van de band. Zo is Mooi Wark Giet De Boer Op ain groot feest vol muzikoaliteit, humor en interaktie mit t pebliek.
k Zel nooit noar n feettìnde goan om n optreden van de siepelrockers te zain, mor in t theoater waiten ze der onverminderd n feest van te moaken. Boerenrock in t theoater, wat mie aangaait is dat Mooier Wark.
