Lieden Hou Doe Logst
n Grunneger laidtekst op Ich Liebe Wie Du Lügst van Ellen ten Damme. As je t strikt nemen, klopt dat nait, want dit nummer is van zochzulf gain origineel waark. t Is n Duutstoalege variaant op Love The Way You Lie van Eminem & Rihanna. Mor ik vin t verschil groot genog om d’uutvoeren van Ellen as uutgangspunt te zain.
k Bin van dizze versie uutgoan, omreden dat k meer heb mit de Duutse toal as mit t Engels. Ook heur k laiver Ellen ten Damme zingen as Rihanna. k Heb haldaal niks mit dat opgefokte rappen van Eminem. k Main ooit n versie mit allenneg de zang van Rihanna op YouTube heurd te hebben, mor dij kin k nait meer vinden. Der staait wel zo’n uutvoeren op van Skylar Grey. Der is ook n Love The Way You Lie Part II, woarin Rihanna n grotere rol speult, mor Eminem ook nog zien aandail het.
k Heb derveur kozen om ‘lieden hou doe logst‘ te schrieven. Grammatikoal zol t mooier/beter Grunnegs wezen om der ‘lieden houstoe logst’ of evt. ‘lieden hou dast logst’ van te moaken, mor noar mien gevuil klinkt dat veur dit nummer te haard.
k Was nait per se van plan de tekst aan n zangeres veur te leggen, mor ook as der niks mit doan wordt, verdaint dizze tekst t om publiceerd te worden. k Bin wel tevree mit wat der staait, mor meer zit der bie mie nait in.
Lieden Hou Doe Logst
Op de eerste dag van ons baaident
Leek de toukomst zo zunnekloar
Mor doe konst die nait meer bedappern
Woarom vin k dat aiglieks nog roar
Zulfs n engel levert vaalse streken
En doe trekst dat in t extreme
Mor altied zelstoe mien held wezen
Ook al bist haldaal van t padje òf
Doe staaist derbie en zugst mie braanden
Dat geft niks òf want ik mag t lieden hou t smaart
Doe staaist derbie en heurst mie schraaien
Dat is mie goud want ik mag t lieden hou doe logst
Hou doe mie bedrogst
Oh-oh-oh, k mag t lieden hou doe logst
Der zit grèlhaid in onze stemmen
Gloazen sneuveln bie elke stried
Dit getaauwtrek zelst altied winnen
Ook al heb ik t geliek aan mien zied
Ik sloek al dij loze proat van die
En leuf nog aal dast holst van mie
t Is bizar, mor aan onze roezies
Heb ik bliekboar ook nog oardeghaid
Doe staaist derbie en zugst mie braanden
Dat geft niks òf want ik mag t lieden hou t smaart
Doe staaist derbie en heurst mie schraaien
Dat is mie goud want ik mag t lieden hou doe logst
Hou doe mie bedrogst
Oh-oh-oh, k mag t lieden hou doe logst
Oh-oh-oh
Meschain bin ik n masochist
Pebaaier te runnen, mor ik blief altied bie die
Tot ons leven aan diggels ligt
Omdat ons laifde n leugen is
Doe staaist derbie en zugst mie braanden
Dat geft niks òf want ik mag t lieden hou t smaart
Doe staaist derbie en heurst mie schraaien
Dat is mie goud want ik mag t lieden hou doe logst
Hou doe mie bedrogst
Oh-oh-oh
Ik mag t lieden hou doe logst
Noar: Ich Liebe Wie Du Lügst, Ellen ten Damme
Duutse tekst: Ellen ten Damme
Producers: Arno Krabman, Paul Pouwer
Origineel: Love The Way You Lie, Eminem & Rihanna
Compositie: Alexander Junior Grant, Holly B. Hafermann, Marshall B. Mathers
Tekst: Alexander Junior Grant, Holly B. Hafermann, Marshall B. Mathers, Skylar Grey
