Project Niks?

Op 9 september was mien vattegste verjoardag. k Heb gain huus vol volk had, k heb t aargens aans vierd. Hoaren schient n goud stee te wezen om sproakmoakende feesten te geven. Dat leek mie wel wat veur mien aigen ‘Project Niks’. Nou ja … niks … nuim dat mor es niks! Veur aine mit Duchenne is vatteg joar nog biezunder genog om der meer van te moaken as n gewone verjoardag. En mien feest was ook zeker nait niks.

Bie restaurant De Twee Provinciën aan t Potterwòlsemeer haar k n schier stee vonden om mien feest te geven. Op dit doalders ploatske haar k tien gasten nuigd veur n etentje, noatied kwammen der nog twinteg lu bie veur n groter feest mit n zeupke, n hapje en Grunneger meziek. Veur de meziek haar k ain van de beste Grunneger artiesten vroagd en dij het joa zegd. Erwin de Vries is ook te bouken veur huuskoamerconcerten. Hai mag geern veur leutje gezelschoppen optreden, zo kin e stoef bie t pebliek kommen en direkt kontakt mit lu moaken. Wèl kon nou beter mien feest opluustern? k Haar hom n e-mail stuurd om noar de meugelkheden te vroagen en k kreeg al gaauw n reaksie dat t deurgoan kon.

In n optreden van twijmoal zowat n uur zong Erwin, begelaaid deur zien gitarist Christof Bauwens en zien toetsenist Bruno Brands, de schierste laidjes en grootste hits uut zien repertoire. k Haar vroagd of e in de speullieste n poar laidjes opnemen wol dij k zulf geern heuren mag. Dat kon en zo wos k zeker dat e ook Vandoage, Grunneger Wicht en Wind zingen ging. Ik haar Erwin al n poar keer in t theoater zain en wos al van zien kwaliteiten as zanger en entertainer. t Was slim schier om dat nou es van zo stoefbie mit te moaken. Veul gasten waren positief verrast, dat k zo’n Grunneger topartiest regeld haar. En dat dij ook zo goud is. Gounent willen nou ook es noar t theoater om hom doar te zain.

k Heb n riege schiere kedo’s kregen: kedokoarten van bol.com en veur t theoater, draank, n madde mit streekprodukten, geld, sokkeloatjes en n rondvoart in Stad. As bedankje en herinnern heb k de gasten t nijste album van Erwin de Vries Leef t leven geven. De bosschop van t album is, dat je t leven koestern (beklokkern volgens de dikke Ter Loan) mouten, op welke menaaier den ook. En doar mout je nait tot joen vattegste mit wachten. Op de dag zulf heb k veul koartjes kregen en felesitoatsies op Facebook en Twitter. Aal mit aal is mien vattegste verjoardag n feest worden dij k mie nog laank herinnern kin.